پاکستانی شوبز انڈسٹری کی خوبصورت اداکارہ اریج محی الدین عید کے موقع پر اپنے قریبی رشتوں کی یاد میں جذباتی ہو گئیں۔

ایک نجی ٹی وی کے عید اسپیشل مارننگ شو میں شرکت کے دوران اداکارہ اریج محی الدین سے پوچھا گیا کہ اسلام آباد میں وہ عید کیسے مناتی ہیں؟

اس سوال کے جواب میں اریج نے افسردگی کا اظہار کرتے ہوئے بتایا کہ ہمیشہ عید اپنے پیاروں، خاص طور پر والد اور نانی کے ساتھ مناتی تھی لیکن اب وہ دونوں اس دنیا میں نہیں رہے۔

انہوں نے دل گرفتہ انداز میں بتایا کہ چند روز قبل نانی کا انتقال ہوا جبکہ والد کا انتقال کچھ برس پہلے ہو چکا تھا۔

اداکارہ نے مزید کہا کہ ان قریبی رشتوں کے جانے کے بعد عید کی خوشیاں وہ نہیں رہیں جو پہلے ہوا کرتی تھیں، اب عید کا دن زیادہ تر ان یادوں میں گزرتا ہے جو ان عزیزوں سے وابستہ ہیں۔