معروف گلوکار عاصم اظہر کے حالیہ کنسرٹ کے دوران اُس وقت غیر متوقع صورتحال پیدا ہوگئی جب کچھ مداحوں نے اُن کی سابقہ منگیتر میرب علی کا نام بلند آواز میں پکارنا شروع کر دیا۔

واقعے کی ویڈیو سوشل میڈیا پر وائرل ہو رہی ہے، جس میں دیکھا جا سکتا ہے کہ عاصم اظہر نے نہایت بردباری اور وقار کے ساتھ ردعمل دیتے ہوئے مداحوں کو خاموش رہنے کی تلقین کی اور کہا کہ براہ کرم، اس طرح کے رویے سے گریز کریں، ہر کسی کی ایک فیملی ہوتی ہے۔

واضح رہے کہ عاصم اظہر اور میرب علی کی منگنی ختم ہونے کی تصدیق خود گلوکار نے انسٹاگرام پر ایک اسٹوری کے ذریعے کی تھی، اس اعلان کے بعد سوشل میڈیا پر ان کے مداحوں میں مختلف آراء سامنے آئیں لیکن کنسرٹ میں اس ذاتی معاملے کو عوامی سطح پر چھیڑنا کئی افراد کو ناپسند گزرا۔

عاصم اظہر کے پُرسکون اور مہذب رویے کو سوشل میڈیا پر خاصا سراہا جا رہا ہے اور مداحوں کا کہنا ہے کہ فنکاروں کی ذاتی زندگی کا احترام سب پر لازم ہے۔