پاکستان کی معروف سوشل میڈیا اسٹار اور ڈیجیٹل کریئیٹر ربیکا خان اور حسین ترین کے مہندی لُک نے سوشل میڈیا پر دھوم مچا دی ہے۔

ربیکا اور حسین ترین کی شادی کی تقریبات بھرپور انداز میں جاری ہیں، گزشتہ شب ربیکا خان اور حسین ترین کی قوالی نائٹ اور مہندی کی رنگا رنگ تقریب منعقد ہوئی، جس میں شوبز اور سوشل میڈیا کی کئی معروف شخصیات نے شرکت کی۔

تقریب کی جان بنیں ربیکا خان، جنہوں نے نیلے فیروزی رنگ کا دیدہ زیب لہنگا چولی پہنا، جس پر چاندی کے شیشے، سیکوئن اور نفیس کڑھائی نے لباس کو مزید دلکش بنا دیا جبکہ جھومر، کندن کے کنگن، چوکر اور آدھے بندھے بال ان کی شخصیت میں خوبصورتی کا اضافہ کر رہے تھے۔

دولہا حسین ترین بھی کسی سے کم نہ تھے، انہوں نے آئس بلیو رنگ کا خوبصورتی سے سجا ہوا کُرتا اور اسٹریٹ ٹراؤزر زیب تن کیا، جو ان کی شخصیت سے خوب میل کھا رہے تھے۔

تقریب میں جنت مرزا، علیشبا انجم، زرنب خالد، معاذ صفدر، صبا معاذ، نادیہ حسین، مدیحہ، ایم جے احسن اور دیگر مشہور انفلوئنسرز نے شرکت کر کے تقریب کو چار چاند لگا دیے۔

یہ یادگار قوالی نائٹ ان کی شادی کی تقریبات کا تیسرا اہم ایونٹ تھا، جس سے قبل ایک خوبصورت ڈھولکی اور مایوں کی تقاریب ہوچکی ہیں۔

ربیکا اور حسین، جو ماضی میں بہترین دوست رہے، اب زندگی کے نئے سفر کا آغاز کرنے جا رہے ہیں، مداحوں کو اب بے صبری سے ان کے نکاح اور رخصتی کی تقریب کا انتظار ہے۔