پاکستان کی معروف اداکارہ مہوش حیات کی بہن افشین حیات نے حال ہی میں ڈرامہ انڈسٹری میں قدم رکھا ہے اور اپنی اداکاری سے ناظرین کا خاصا دھیان حاصل کیا ہے۔

افشین حیات نے اپنے حالیہ انٹرویو میں بتایا کہ وہ موسیقی کی دنیا سے کئی سالوں سے جڑی ہوئی ہیں، مگر ڈرامہ پراجیکٹس میں انہوں نے اب تک چند محدود سپورٹنگ کردار ادا کیے ہیں، تاہم حالیہ ڈرامہ “ڈائن” میں ان کے منفی کردار نے انہیں خاصی شہرت اور توجہ دلائی ہے۔

اداکارہ افشین کا کہنا تھا کہ اب وہ باقاعدگی سے اسکرین پر آنے کی کوشش کریں گی کیونکہ اس ڈرامے نے انہیں اپنی صلاحیتیں دکھانے کا موقع فراہم کیا ہے اور ناظرین کی جانب سے مثبت ردعمل مل رہا ہے۔

 انہوں نے یہ بھی بتایا کہ وہ کافی عرصے سے تھیٹر میں بھی سرگرم ہیں اور معروف اداکار یاسر حسین کے ساتھ کام کرنے کا تجربہ بھی رکھتی ہیں۔

دلچسپ بات یہ ہے کہ اس ڈرامے میں مہوش حیات مرکزی کردار میں ہیں اور ان کے ساتھ افشین بھی ایک اہم کردار نبھا رہی ہیں لیکن زیادہ تر ناظرین کو یہ بات معلوم نہیں تھی کہ مہوش حیات کی بہن بھی اسی ڈرامے کا حصہ ہیں۔