پاکستانی سنیما کی معروف ہارر فلم ’دیمک‘ کو ایک اور عالمی اعزاز حاصل ہو گیا ہے۔

فلم کو شنگھائی تعاون تنظیم (ایس سی او) فلم فیسٹیول 2025 میں باضابطہ طور پر شامل کر لیا گیا ہے، جو کہ پاکستان کی فلمی صنعت کے لیے ایک قابلِ فخر لمحہ ہے۔

یہ باوقار بین الاقوامی فلمی میلا 3 تا 7 جولائی 2025 کو یونگچوان، چونگچنگ، چین میں منعقد ہو رہا ہے، جس کا مقصد رکن اور مبصر ممالک کے درمیان ثقافتی ہم آہنگی، فلمی تبادلے اور تخلیقی تعاون کو فروغ دینا ہے۔

فلم ’دیمک‘ اس فیسٹیول میں جنوبی و وسطی ایشیا کی دیگر منتخب فلموں کے ساتھ نمائش کے لیے پیش کی جائے گی۔

میلے کے دوران فلمی نمائشوں کے علاوہ مختلف مقابلے، مکالماتی سیشنز اور بین الاقوامی تعاون پر مبنی اجلاس بھی منعقد کیے جائیں گے، تاہم فلم کے ہدایت کار رافع راشدی کو فیسٹیول میں خصوصی شرکت کی دعوت دی گئی ہے۔

 اس موقع پر انہوں نے اظہارِ خیال کرتے ہوئے کہا کہ یہ ہمارے لیے اعزاز کی بات ہے کہ فلم ’دیمک‘ کو ایک بین الاقوامی اسٹیج پر پاکستانی سنیما کی نمائندگی کا موقع ملا ہے، جنوبی ایشیائی لوک روایات اور ہارر تھیم پر مبنی مواد کو جس طرح عالمی سطح پر سراہا جا رہا ہے، یہ اسی رجحان کا مظہر ہے۔

یاد رہے کہ فلم ’دیمک‘ کو پاکستان بھر میں ’مانڈوی والا انٹرٹینمنٹ‘ کے بینر تلے ریلیز کیا گیا تھا، جہاں اسے تجارتی و تنقیدی کامیابی حاصل ہوئی، اب یہ فلم عالمی فلمی میلوں میں شرکت کے ذریعے پاکستانی سنیما کی تخلیقی جہتوں کو دنیا کے سامنے اجاگر کر رہی ہے۔