کراچی: حالیہ دنوں میں سوشل میڈیا پر کچھ ویڈیوز وائرل ہورہی ہیں جن میں ایک شخص کراچی کی سڑکوں پر “گرینڈ آپریشن” کا نعرہ لگاتے ہوئے پولیس کے ساتھ منشیات کے عادی افراد کو گرفتار کرتا دکھائی دیتا ہے۔

ویڈیوز کی خاص بات یہ ہے کہ جیسے ہی یہ شخص سامنے ہوتا ہے، نشے کے عادی افراد فوراً فرار ہونے کی کوشش کرتے ہیں لیکن آخرکار پولیس کی مدد سے وہ دھر لیے جاتے ہیں۔

بہت سے صارفین کے ذہن میں یہ سوال گردش کر رہا ہے کہ یہ شخص کون ہے اور کس حیثیت سے نشے کے عادی افراد کے خلاف کارروائی کر رہا ہے؟

یہ شخص دراصل یونس امین ہیں، جو “اینٹی نارکوٹکس اینڈ کرائم کنٹرول سوشل اوئیرنیس فاؤنڈیشن” کے ساتھ کام کر رہے ہیں۔

مزید پڑھیں: سندھ میں منشیات فروشوں کے خلاف سخت کارروائی کا فیصلہ

 انہوں نے حال ہی میں ایک پوڈکاسٹ میں شرکت کرتے ہوئے اپنے مشن کی تفصیلات شیئر کیں اور بتایا کہ ان کا مقصد کراچی کو منشیات سے پاک کرنا اور نئی نسل کو اس لعنت سے بچانا ہے، شہر میں ہزاروں افراد نشے کے عادی ہو چکے ہیں جو چوری، ڈکیتی اور دیگر جرائم میں ملوث ہوتے ہیں اور اکثر گلیوں میں لاوارث مر جاتے ہیں۔

یونس امین نے وضاحت کی کہ نشے کے عادی افراد کو سڑکوں سے اٹھا کر ری ہیب سینٹر منتقل کرتے ہیں جہاں ان کا علاج کیا جاتا ہے، ہم ان افراد کو صاف ستھرا بنانے کے لیے نہ صرف گنجا کرتے ہیں بلکہ غسل کروا کر نئے کپڑے بھی پہناتے ہیں تاکہ وہ انسانی وقار کے ساتھ زندگی کی جانب واپس لوٹ سکیں۔

انہوں نے والدین کو خبردار کیا کہ اگر بچوں پر نظر نہ رکھی گئی تو وہ غلط صحبت میں پڑ کر نشے کی طرف مائل ہو سکتے ہیں۔ آئس اور کرسٹل جیسے نشے سب سے زیادہ خطرناک ہیں اور نوجوان نسل کو تباہ کر رہے ہیں۔

یونس امین نے مزید بتایا کہ ان کی ویڈیوز وائرل ہونے کے بعد انہیں شناخت چھپانے کے لیے اپنا حلیہ بدل کر باہر نکلنا پڑتا ہے۔

انہوں نے یہ بھی انکشاف کیا کہ انہیں منشیات فروشوں اور ان کے سہولت کاروں کی طرف سے جان سے مارنے کی دھمکیاں مل چکی ہیں کیونکہ ان کے آپریشن سے ان کا نیٹ ورک متاثر ہو رہا ہے۔

آخر میں یونس امین نے اپیل کی کہ اگر ہم اپنی نسل کو محفوظ دیکھنا چاہتے ہیں تو ہمیں نشے کے خلاف متحد ہو کر جدوجہد کرنی ہو گی، یہ صرف ایک شخص کی نہیں، پورے معاشرے کی ذمہ داری ہے۔