معروف تاجک گلوکار اور سوشل میڈیا انفلوئنسر عبدو روزق کو ہفتے کے روز دبئی انٹرنیشنل ایئرپورٹ پر حراست میں لیے جانے کے بعد رہا کر دیا گیا۔

غیر ملکی میڈیا رپورٹس کے مطابق 21 سالہ عبدو روزق کو مونٹی نیگرو سے دبئی پہنچنے پر حراست میں لیا گیا تھا، اب انکو ضمانت پر رہا کردیا گیا ہے جبکہ مبینہ طور پر ان کے بیرون ملک سفر پر پابندی عائد کی گئی ہے، تاہم یہ تمام تفصیلات تاحال کسی سرکاری ذریعے سے تصدیق شدہ نہیں ہیں۔

دبئی میڈیا آفس نے اس معاملے پر کوئی تبصرہ کرنے سے انکار کیا اور نہ ہی دبئی پولیس کی جانب سے کوئی باضابطہ بیان جاری کیا گیا ہے۔

گرفتاری کے چند گھنٹوں بعد عبدو روزق نے انسٹاگرام پر ایک ویڈیو شیئر کی، جس میں وہ دبئی میں 12 جولائی کو ہونے والے انڈیا انٹرنیشنل انفلوئنسر ایوارڈز میں شرکت کرتے نظر آ رہے ہیں، تاہم ویڈیو میں گرفتاری سے متعلق کوئی ذکر موجود نہیں تھا۔

واضح رہے کہ عبدو روزق، جو ہارمونی مسائل کے باعث قد میں پست ہیں، دبئی میں مقیم ہیں اور یو اے ای کا گولڈن ویزا رکھتے ہیں، تاہم انہوں نے سوشل میڈیا، میوزک اور معروف ریئلٹی شو “بگ باس 16” کے ذریعے عالمی شہرت حاصل کی۔

2024 میں انہوں نے باکسنگ کی دنیا میں قدم رکھا اور برطانیہ میں اپنا ریسٹورنٹ برانڈ “حبیبی” متعارف کروایا، اسی سال بھارت میں وہ ایک منی لانڈرنگ کیس میں تفتیش کا سامنا بھی کر چکے ہیں، تاہم ان کے خلاف کوئی فرد جرم عائد نہیں کی گئی۔