متنازع ویڈیو وائرل ہونے کے بعد معروف اداکارہ ہانیہ عامر اور نوجوان اداکار و گلوکار عاشر وجاہت کی دوستی سے متعلق اہم انکشافات سامنے آگئے ہیں۔

شوبز انڈسٹری میں قریبی دوستیاں عام بات سمجھی جاتی ہیں، اور اداکارہ ہانیہ عامر بھی اپنے کئی ساتھی فنکاروں کے ساتھ دوستانہ تعلقات کے باعث خبروں میں رہتی ہیں، ایک وقت تھا جب ہانیہ عامر اور عاشر وجاہت کو اکثر ایک ساتھ تفریحی مواقع پر دیکھا جاتا تھا اور ان کی دوستی پر شوبز حلقوں میں بھی بات کی جاتی تھی۔

تاہم جون 2021 میں ایک ویڈیو سامنے آئی جس میں ہانیہ عامر، عاشر وجاہت اور ان کے بھائی نائل کو میوزک پر لپ سنکنگ کرتے اور بےتکلف انداز میں ایک ساتھ وقت گزارتے دیکھا گیا۔

یہ ویڈیو سوشل میڈیا پر وائرل ہوگئی اور شدید عوامی تنقید کا نشانہ بنی، اس کے بعد سے عاشر اور ہانیہ کو سوشل میڈیا پر ایک ساتھ نہیں دیکھا گیا۔

گلوکار عاشر وجاہت نے حالیہ پوڈکاسٹ گفتگو کے دوران انکشاف کیا ہے کہ انہوں نے شوبز انڈسٹری کے قریبی دوستوں سے کچھ حد تک فاصلے کیوں اختیار کیے۔

عاشر وجاہت نے اپنے پوڈکاسٹ میں بتایا کہ اس واقعے کے بعد ایک سینئر اداکار نے انہیں مشورہ دیا کہ شہرت یافتہ شخصیات کے ساتھ نظر آنے کے بجائے اپنے فن اور کیریئر پر توجہ دوں تاکہ اپنی صلاحیتوں کو بہتر طور پر اجاگر کرسکوں۔

اداکار نے یہ بھی واضح کیا کہ وہ اب بھی اپنے پرانے دوستوں سے ملتے ہیں لیکن ان لمحات کو سوشل میڈیا پر شیئر نہیں کرتے کیونکہ اب ان کی توجہ ذاتی ترقی اور پیشہ ورانہ بہتری پر مرکوز ہے۔