پاکستان کی معروف اداکارہ ہانیہ عامر کی منگنی سے منسوب تصاویر اور ویڈیوز نے سوشل میڈیا پر تہلکہ مچا دیا، جس پر مداح حیرت اور تجسس کا شکار ہو گئے۔

ویڈیو میں ایک لڑکی کو ہلکے گلابی اور کریمی پرنٹڈ لباس میں ہاتھوں میں گجرے پہنے اور گلدستہ وصول کرتے ہوئے خوشگوار انداز میں مسکراتے دیکھا گیا۔

 انداز، لباس اور چہرے کے تاثرات اس قدر مماثل تھے کہ سوشل میڈیا صارفین نے فوری طور پر اسے ہانیہ عامر سمجھ لیا۔

یہ ویڈیو ایسے وقت میں وائرل ہوئی جب سوشل میڈیا پر ہانیہ عامر اور گلوکار عاصم اظہر کے درمیان تعلقات کی بحالی کی افواہیں ایک بار پھر گردش کررہی تھیں، جس سے معاملہ مزید دلچسپ ہو گیا۔

تاہم کچھ ہی دیر بعد حقیقت سامنے آگئی کہ ویڈیو میں موجود لڑکی ہانیہ عامر نہیں بلکہ ان کی ہمشکل بشریٰ میمن ہیں، جنہوں نے اپنی منگنی کی ویڈیو اپنے انسٹاگرام اکاؤنٹ پر شیئر کی، جس میں ان کے ساتھ بیٹھے نوجوان کو ان کا منگیتر عمر حسین بتایا جا رہا ہے۔

 ویڈیو وائرل ہوتے ہی سوشل میڈیا پر دھوم مچ گئی اور صارفین کی بڑی تعداد نے انہیں ہانیہ عامر سمجھ کر تبصرے شروع کر دیے۔

دلچسپ بات یہ ہے کہ نہ صرف بشریٰ کے نین نقش ہانیہ عامر سے ملتے جلتے ہیں بلکہ انہوں نے اپنا ہیئر اسٹائل اور فیشن سینس بھی سپر اسٹار سے متاثر ہو کر اپنایا ہے، جس کی وجہ سے وہ مزید ہانیہ کی “جڑواں بہن” لگنے لگی ہیں۔

مداحوں کی جانب سے اس ویڈیو پر ملا جلا ردعمل دیکھنے میں آیا، کچھ نے بشریٰ کو “سوشل میڈیا کی ہانیہ عامر” قرار دیا، تو کچھ نے مزاحیہ انداز میں کہا کہ ’’ہم نے تو دل ہی دے دیا تھا پر یہ تو کوئی اور نکلی!‘‘