پاکستانی معروف گلوکار و اداکار فرحان سعید نے اپنی اہلیہ اور مشہور اداکارہ عروہ حسین کی سالگرہ کے موقع پر محبت اور جذبات سے بھرپور پیغام سوشل میڈیا پر شیئر کر کے مداحوں کے دل جیت لیے۔

یہ جوڑی اس وقت شمالی علاقہ جات کے خوبصورت مناظر سے لطف اندوز ہو رہی ہے اور اپنی فیملی ٹرپ کی جھلکیاں انسٹاگرام پر مداحوں سے شیئر کر رہی ہے۔

اس خصوصی سفر کو فرحان سعید نے کچھ اس انداز میں ترتیب دیا کہ عروہ حسین کی سالگرہ بھی اسی دوران آ گئی، جسے انہوں نے یادگار بنانے میں کوئی کسر نہ چھوڑی۔

فرحان سعید نے وادی اسکردو میں لی گئی ایک تصویر پوسٹ کی، جس میں دونوں نے گلگت بلتستان کی روایتی چترالی ٹوپیاں پہن رکھی ہیں۔ فرحان سفید چترالی ٹوپی میں جبکہ عروہ حسین خواتین کی مخصوص روایتی ٹوپی پہنے نظر آئیں۔

اداکار نے اپنی پوسٹ میں اہلیہ سے محبت کا اظہار کرتے ہوئے لکھا کہ سالگرہ مبارک ہو بے بی، میری سب سے پسندیدہ ہم سفر، تم نے مجھے زندگی کے سب سے حسین لمحے دیے ہیں۔

انہوں نے مزید کہا کہ تمہارے ساتھ رہ کر میں نے بہت کچھ سیکھا، تمہارا حسِ مزاح لاجواب ہے اور سب سے بڑھ کر، میں اپنی پوری زندگی تمھارے ساتھ گزارنا چاہتا ہوں، تم جیسی ہو ویسی ہی رہو، اس کے لیے شکریہ!

بعدازاں مداحوں نے بھی اس جوڑی کو ڈھیروں محبت بھری دعائیں دیں جبکہ کئی صارفین نے فرحان سعید کی اس پوسٹ کو “سال کی سب سے رومانوی پوسٹ” قرار دیا۔