پاکستان کی معروف اداکارہ درفشاں سلیم نے اداکار بلال عباس کے ساتھ خفیہ نکاح کی خبروں پر پہلی بار خاموشی توڑ دی ہے اور ان افواہوں کو بے بنیاد قرار دیا ہے۔

حال ہی میں دیے گئے ایک انٹرویو میں درفشاں سلیم نے کہا کہ اگر واقعی ایسا کچھ ہوا ہوتا تو اس کی تصاویر ضرور سامنے آجاتیں، شادی جیسا ذاتی اور اہم موقع کوئی چھپا کر نہیں رکھتا اور لوگ عام طور پر اپنی خوشی کے لمحات سوشل میڈیا پر ضرور شیئر کرتے ہیں۔

درفشاں نے بتایا کہ وہ پچھلے پانچ سال سے شوبز انڈسٹری میں سرگرم ہیں اور اگرچہ یہ طویل عرصہ نہیں لیکن انہیں جو محبت اور پذیرائی ملی، وہ اس پر خود کو خوش قسمت سمجھتی ہیں۔

 انکا کہنا تھا کہ مداحوں کی محبت بعض اوقات انہیں خوفزدہ بھی کر دیتی ہے کیونکہ وہ نہیں چاہتیں کہ ان کے کام سے کوئی مایوس ہو۔

درفشاں سلیم نے بلال عباسخان کے ساتھ کام کرنے کے تجربے پر بات کرتے ہوئے بتایا کہ دونوں کے درمیان بہت اچھا کمفرٹ لیول تھا اور شوٹنگ کے دوران دونوں ہنسی مذاق میں وقت گزارا کرتے تھے۔

 انہوں نے کہا کہ ہم دونوں چھوٹی چھوٹی باتوں پر ہنس پڑتے تھے، اسی لیے سیٹ پر ماحول ہلکا پھلکا رہتا تھا۔

انٹرویو میں اداکارہ نے میڈیا پر بغیر تصدیق خبروں کی اشاعت پر بھی تنقید کی اور کہا کہ پاکستان میں بھی اب بھارتی طرز کی غیر مصدقہ صحافت فروغ پا رہی ہے، جہاں خبریں تصدیق کے بغیر ہی شائع کردی جاتی ہیں۔

واضح رہے کہ گزشتہ سال ایک یوٹیوبر نے دعویٰ کیا تھا کہ درفشاں سلیم اور بلال عباس خان نے خفیہ نکاح کر لیا ہے، یہ قیاس آرائی ان کے مقبول ڈرامے عشق مرشد کے دوران اُن کی آن اسکرین کیمسٹری اور پریمئیر ایونٹ پر نظر آنے والی قربت کی بنیاد پر کی گئی تھی۔

تاہم، درفشاں سلیم نے اس انٹرویو میں تمام افواہوں کو مسترد کر کے ان خبروں پر واضح مؤقف اختیار کر لیا ہے۔