کلاسیکی موسیقی کے معروف گلوکار اسد امانت علی خان کی 70ویں سالگرہ آج منائی جارہی ہے۔

لاہور کے نامور گائیک اسد امانت علی خان 25 ستمبر 1955 کو پیدا ہوئے۔ وہ استاد امانت علی خان کے صاحبزادے تھے اور اپنے والد سے گائیکی کا ہنر وراثت میں پایا، تاہم اپنی منفرد آواز اور انداز کے باعث انہوں نے فنِ موسیقی میں ایک الگ مقام بنایا۔

اسد امانت علی خان نے صرف 10 سال کی عمر میں باقاعدہ گانا شروع کیا اور کم عمری ہی میں اپنی صلاحیتوں سے کلاسیکی موسیقی کے خانوادے کو ایک نئی پہچان بخشی۔ ان کی گائی ہوئی غزلیں اور کلاسیکی راگ نہ صرف پاکستان بلکہ دنیا بھر میں مقبول ہوئے۔

انہیں سب سے پہلی پہچان والد کی مشہور غزل “انشا جی اٹھو اب کوچ کرو” گانے سے ملی، جبکہ اصل شہرت “عمراں لنگھیاں پباں بھار” نے بخشی۔

اس کے علاوہ “کل چودھویں کی رات تھی”، “آنکھیں غزل ہیں آپ کی”، “گھر واپس جب آؤ گے تم” سمیت کئی یادگار نغمے ان کے کریڈٹ پر ہیں۔

فنِ موسیقی میں نمایاں خدمات کے اعتراف میں حکومتِ پاکستان نے انہیں 2007 میں تمغہ برائے حسنِ کارکردگی سے نوازا۔ اسی برس وہ لندن میں خالقِ حقیقی سے جا ملے۔