پاکستانی اداکارہ اور ماڈل عائشہ عمر نے اپنے نئے شو ’لازوال عشق‘ پر ہونے والی تنقید کا جواب دیتے ہوئے واضح کیا ہے کہ یہ کسی بھی طور پر ڈیٹنگ شو نہیں بلکہ شادی اور رشتے پر مبنی ایک ریئلٹی پروگرام ہے۔

عائشہ عمر نے اپنی خصوصی گفتگو میں بتایا کہ کچھ میڈیا اداروں نے شو کو مغربی طرز کے ڈیٹنگ فارمیٹ کے طور پر پیش کیا، جو سراسر غلط تاثر ہے۔

ان کے مطابق اس شو کا مقصد نوجوانوں کو بامعنی بات چیت کا موقع دینا، تعلقات کی سمجھ پیدا کرنا اور شادی کے لیے موزوں ساتھی تلاش کرنے میں مدد دینا ہے۔

عائشہ عمر نے مزید کہا کہ میں نے کبھی نہیں کہا کہ یہ پاکستانی ڈیٹنگ شو ہے، یہ صرف اور صرف زندگی کا ساتھی تلاش کرنے کے بارے میں ہے۔

انہوں نے وضاحت کی کہ شرکاء ایک ولا میں رہیں گے، مگر انتظامات مکمل طور پر مقامی اقدار کے مطابق ہوں گے۔ لڑکوں اور لڑکیوں کے لیے علیحدہ فلورز اور ڈورمز مختص ہوں گے جبکہ صرف لاؤنج، کچن اور پول سائیڈ مشترکہ جگہیں ہوں گی جہاں وہ گفتگو کر سکیں گے۔

اداکارہ نے اس شو کو ایک سماجی تجربہ قرار دیا اور کہا کہ اس میں دکھایا جائے گا کہ نوجوان کس طرح بات کرتے ہیں، کہاں غلطی کرتے ہیں اور کس طرح انہیں درست کرتے ہیں۔

شو کے فارمیٹ کے مطابق شرکاء میں کوئی پہلے سے طے شدہ جوڑا شامل نہیں ہوگا بلکہ تعلقات قدرتی طور پر میل جول کے ذریعے قائم ہوں گے اور مقصد شادی ہوگا۔ اس میں مختلف کمیونیکیشن بیسڈ گیمز اور ٹاسکس شامل ہوں گے۔

یاد رہے کہ لازوال عشق کو ترکی کے ایک پرتعیش ولا میں فلمایا گیا ہے اور یہ صرف یوٹیوب پر نشر ہوگا، ٹی وی پر نہیں۔ تقریباً 100 اقساط پر مشتمل اس شو میں مقابلے، اتحاد، اختلافات اور جذباتی اتار چڑھاؤ دکھائے جائیں گے جبکہ آخر میں ایک وننگ کپل کا انتخاب کیا جائے گا۔