آسکرز ایوارڈز 2023 میں کسی بھی ہنگامی صورتحال سے نمٹنے کیلئے ’کرائسس ٹیم‘ تشکیل دے دی گئی۔

گزشتہ آسکرز ایوارڈز کی تقریب میں ہالی ووڈ اداکار  وِل اسمتھ اور کامیڈین کرس راک کے درمیان تلخ کلامی اور تھپڑ مارنے کے واقعے کو مدِنظر رکھتے ہوئے اکیڈمی آف موشن پکچر آرٹس اینڈ سائنسز نے رواں سال 12 مارچ کو لاس اینجلس میں ہونے والے ایونٹ میں اس قسم کی صورتحال سے نمٹنے کیلئے اقدامات کر لیے۔

 آسکرز کے سی ای او بل کرمر نے ٹائم میگزین کے ساتھ ایک انٹرویو کے دوران انکشاف کیا کہ اکیڈمی کے پاس کسی بھی ممکنہ تنازعات سے بچنے کے لیے اس سال ایک پوری ’کرائسس ٹیم‘ ہے۔

 انہوں نے مزید کہا کہ  اُمید ہے اس آسکرز میں کوئی ناقابلِ یقین واقعہ پیش نہیں آئے گا۔

واضح رہے کہ گزشتہ برس 94 ویں اکیڈمی ایوارڈز کی تقریب میں امریکی اداکار وِل اسمتھ نے اپنی اہلیہ سے متعلق مذاق کرنے پر میزبان اور کامیڈین کرس راک کو اسٹیج پر جاکر تھپڑ مار دیا تھا اور بدتمیزی بھی کی تھی۔

اس واقعے کی ویڈیو کئی دنوں تک سوشل میڈیا پر گردش کرتی رہی جبکہ  تھپڑ کے واقعے کے بعد وِل اسمتھ کو شدید تنقید کا سامنا کرنا پڑا۔

یہ بھی پڑھیں: ول اسمتھ کے ہاتھوں تھپڑ کھانے والے کامیڈین واقعے پر بات کرتے ہوئے رو پڑے

تاہم انہوں نے شرمندہ ہوکر سوشل میڈیا پر ویڈیو جاری کرتے ہوئے اکیڈمی اور کرس راک سے خصوصی طور پر معافی مانگی تھی۔