پنجاب میں ڈینگی کےجان لیوا حملے جاری،فیصل آبادکےالائیڈ ہسپتال میں زیر علاج ایک اور مریض میں ڈینگی وائرس کی تصدیق ہوگئی۔

تفصیلات کے مطابق اسپتال انتظامیہ کاکہناہے کہ رواں سال ڈینگی سے متاثرہ مریضوں کی تعداد 162ہوگئی، متاثرہ مریض احمد مجتبہ تاندلیانوالہ کا رہائشی ہے۔

اسپتال انتظامیہ کامزید کہناتھا کہ رواں سال ڈینگی وائرس کے باعث 2 مریض جاں بحق  ہوئے۔

گزشتہ روزراولپنڈی میں مزید دوافراد ڈینگی وائرس کےباعث جاں بحق ہوگئے۔ڈینگی کا شکارطلحہ اور گل محمد ہولی فیملی اسپتال میں زیر علاج تھے۔ دونوں متاثرین کا تعلق اسلام آباد سےتھا۔ راولپنڈی میں ڈینگی سے ہلاکتوں کی تعداد 32 ہوگئی۔

پنڈی بھٹیاں میں گزشتہ روزڈینگی کا ایک اور مریض سامنے آگیا ۔ نواحی گاوں ٹھٹھہ ملیاں کے رہائشی مریض میں ڈینگی کی تصدیق ہوئی ہے جس کےبعدضلع میں ڈینگی سے متاثرہ مریضوں کی تعداد 20 ہوگئی۔

شہریوں کاکہناہے کہ ضلعی انتظامیہ اورمحکمہ ہیلتھ نے ڈینگی پر قابو پانے کے لیے اقدامات نہیں کیے۔ شہریوں کی جانب سے حکومت سے مطالبہ کیاگیا کہ علاقہ میں فوری اسپرے کروائےجائیں۔

سندھ میں ڈینگی سے 24 گھنٹوں کے دوران 235 افراد متاثرہوئے ہیں۔

محکمہ صحت سندھ کے مطابق اکتوبر کے مہینے میں سندھ میں دو ہزار930 افراد ڈینگی کا شکار ہوئے جس میں دو ہزار723 افراد کا تعلق کراچی سے ہے۔

 کراچی میں رواں سال 5ہزار766 افراد ڈینگی سے متاثر ہوئے۔ کراچی سمیت سندھ بھرمیں یہ تعداد 6ہزار147 ہوگئی۔

رواں سال ڈینگی سے نارتھ کراچی کی رہائشی 20 سالہ لڑکی جاں بحق ہوئی جس کو گزشتہ ہفتہ نجی اسپتال منتقل کیا گیا تھا۔

گزشتہ روزڈینگی کامریض ژوب سے کوئٹہ لایاگیا۔ جس کے بعدشہرمیں ڈینگی کےشکار اسپتال میں زیرعلاج مریضوں کی تعداد چارہوگئی۔