امریکی سائنسدانوں نے دعویٰ کیا ہے کہ سورج کی شعائیں کورونا وائرس  کو ختم کردیتی ہیں۔

امریکی میڈیا کے مطابق ایک امریکی اعلیٰ عہدیدار کے حوالے سے کہا ہے کہ سرکاری سائنسدانوں کی تحقیق سے موسم گرما میں کورونا وائرس کے پھیلاؤ میں کمی آنے کی امید پیدا ہوئی ہے۔

وائٹ ہاؤس کی کورونا وائرس ٹاسک فورس بریفنگ میں ایک وفاقی عہدیدار تحقیق کے حوالے سے بتایا کہ سورج کی روشنی ، گرمی اور نمی سخت سطحوں اور ہوا میں کورونا وائرس کو کمزور کرسکتی ہے۔

محکمہ ہوم لینڈ سیکیورٹی میں سائنس اینڈ ٹیکنالوجی ڈائریکٹوریٹ کے قائم مقام سربراہ ، ولیم برائن نےاسے ’ ابھرتے ہوئے نتائج‘ قرار دیا ہے۔

انہوں نے کہا تحقیق سے یہ ثابت ہوتا ہے کہ تھوک کے قطرہ میں موجود کورونا وائرس اندرونی اور خشک حالتوں میں بہترین طور پر زندہ رہتا ہے، تاہم گرم موسم اور نمی میں وہ جلد مرجاتا ہے۔

برائن نے مزید کہا کہ   ہمارا آج تک کا سب سے حیرت انگیز مشاہدہ  ہے کہ  شمسی روشنی  وائرس  کو  ہوا میں  اور سطح پر دونوں جگہ ہلاک کردیتی ہے۔

انہوں نے مزید کہا کہ ایسا ہی  اثر ہم نے درجہ حرارت اور نمی دونوں کے ساتھ بھی دیکھا ہے ، جیسے جیسے درجہ حرارت اور نمی میں اضافہ ہوتا ہے  ویسے ویسے وائرس کمزور پڑتا جاتا ہے۔

تاہم تحقیقاتی رپورٹ دیگر سائنسدانوں کے تجزیے کے لیے فی الحال جاری نہیں کی گئی ہے۔