ملک بھر میں کورونا وائرس کے ٹیسٹوں کے من مانے دام لئے جانے لگے ہیں جس کے بعد ہیلتھ اتھارٹی ایکشن میں آگئی ہے۔

تفصیلات کے مطابق کورونا وائرس کے من مانے داموں پر جب ہیلتھ اتھارٹی ایکشن میں آئی تو اسلام آباد ہیلتھ کیئر اتھارٹی نے کورونا ٹیسٹ کی فیس مقرر کر دی۔

اسلام آباد ہیلتھ اتھارٹی کی جانب سے نجی اسپتالوں، لیبارٹریوں، کلیکشن پوائنٹس کے نام مراسلہ لکھا گیا جس میں بتایا گیا ہے کہ کورونا ٹیسٹ کی مقرر کردہ فیس تمام نجی اسپتالوں، لیبارٹریوں پر لاگو ہو گی۔

ہیلتھ اتھارٹی کا کہنا ہے کہ کورونا ٹیسٹ فیس این سی او سی کے فیصلے کے مطابق طے کردہ ہے، کورونا پی سی آر ٹیسٹ کرنے والے ادارے ریٹس فوری منجمد کریں۔

ہیلتھ کیئر کی مقرر کردہ فیس کے مطابق چائنیز کٹس سے ہونے والے کورونا ٹیسٹ کی فیس 5500 مقرر جبکہ دیگر ٹیسٹنگ کٹس سے ہونے والے کورونا ٹیسٹ کی فیس 6500 مقرر کردی گئی ہے۔

مراسلے میں بتایا گیا ہے کہ ہیلتھ اتھارٹی نجی اسپتالوں، لیبارٹریوں، کلیکشن پوائنٹس کا معائنہ کرے گی اور قانون شکن اسپتالوں، لیبارٹریوں کے خلاف سخت ایکشن لیا جائے گا۔

قانون شکن اسپتالوں، لیبارٹریوں کو جرمانہ ادا کرنا پڑے گا جبکہ انہیں سیل بھی کیا جائے گا۔