چیئرمین این ڈی ایم اے لیفٹیننٹ جنرل محمد افضل نے وزیراعظم کے ہمراہ لاہور کے اسپتالوں کا دورہ کیا ہے۔

تفصیلات کے مطابق وزیراعظم کی ہدایت پر چیئرمین این ڈی ایم اے لیفٹیننٹ جنرل محمد افضل نے لاہور کے تین کورونا اسپتالوں کا دورہ کیا ہے، اس موقع پر چیئرمین این دی ایم اے نے کہا ہے کہ ایکسپو کورونا سینٹر میں 200 کم پریشر والے آکسیجن بیڈز اور 20 ہائی پریشر بائی پیپ بیڈز اور 20 آئی سی یو ونٹیلیٹرز بھی مہیا کیے جائیں گے۔

اس موقع پر چیئرمین این ڈی ایم اے کا کہنا تھا کہ ریسکیو 1122 کو 15مزید پورٹیبل ونٹیلیٹرز بھی فراہم کیے جائیں گے جبکہ 25 پورٹیبل ونٹیلیٹرز پہلے ہی بھجوائے جا چکے ہیں۔

لیفٹیننٹ جنرل محمد افضل نے کہا ہے کہ پنجاب کڈنی اینڈ لیور ٹرانسپلانٹ انسٹیٹیوٹ کو 30 کم پریشر آکسیجن بیڈز، 50 ہائی پریشر بائی پیپ اور 20 آئی سی یو ونٹیلیٹرز بھی پی کے ایل آئی کو فراہم کیے جائیں گے۔

انہوں نے بتایا کہ سوشل سیکورٹی ہسپتال کو 20 ہائی پریشر بائی پیپ اور20 لو پریشر آکسیجن بیڈز جبکہ  10آئی سی یو ونٹیلیٹرز بھی سوشل سیکورٹی ہسپتال کو فراہم کیے جائیں گے۔

چیئرمین این ڈی ایم اے نے اپنے دورے کے دوران واضح کیا ہے کہ وہ اسی سلسے میں آئندہ منگل کو کراچی کا بھی دورہ کریں گے، کراچی کے اسپتالوں میں کورونا مریضوں کے لیے درکار ضروریات کا جائزہ لیا جائے گا۔