کورونا وائرس سے نبرد آزما ہیلتھ کئیر ورکرز کی مدد  کے لیے ہیلپ لائن قائم کردی گئی۔

 معاون خصوصی برائے صحت ڈاکٹر ظفر مرزا  نے میڈیا بریفنگ میں کہا کہ  کورونا کے حوالے سے حکمت عملی میں فرنٹ لائن ہیلتھ کئیر ورکرز کی فلاح و بہبود اولین ترجیح ہے۔

معاون خصوصی برائے صحت کا کہنا تھا کہ ہم نے حال ہی میں ایک جامع سپورٹ  پیکج کا اعلان کیا تھا۔ہم نے کہا تھا بہت جلد ایک ایسی ہیلپ لائن قائم کریں گے جہاں کورونا وائرس سے لڑتے ہیلتھ کئیر ورکر زشکایت درج کرواسکیں گے۔

ڈاکٹر ظفر مرزا نے کہا کہ  آج سے یہ ہیلپ لائن اپنا کام شروع کر دے گی۔ہیلپ لائن کا مرکز این سی او سی ہوگا۔

انہوں نے بتایا کہ  ہیلتھ کئیر ورکر زدو طریقے سے اپنی شکایات بھیج سکیں گے۔

معاون خصوصی برائے صحت نے بتایا کہ ہیلتھ کئیر ورکر ز1166 کے علاوہ خصوصی واٹس ایپ نمبر پر بھی اپنی شکایت بھیج سکتے ہیں۔ +923001111166  واٹس ایپ چیٹ باٹ میں ہیلتھ کئیر ورکرز اپنی شکایت لکھ کر بھیج سکتے ہیں۔

ڈاکٹر ظفر مرزا نے بتایا کہ شکایت بھیجنے کے بعد ٹھوس بنیادوں پر کمپلینٹ مینجمنٹ کا نظام حرکت میں آئے گا۔ شکایت ملنے کے بعد سسٹم کے تحت پتہ چلے گا کہ شکایت کس صوبے کے متعلق ہے اور فوکل پرسنز کو فوری بھیجی جائے گی۔

انہوں نے مزید کہا کہ  شکایت حل کرکے آپ کے نمبر پر رابطہ کرکے بتایا جائے گا کہ کس طرح آپ کی شکایت کا ازالہ کیا گیا ہے یا اس کا اسٹیٹس کیا ہے۔

معاون خصوصی برائے صحت نے کہا کہ  وزیر اعظم اور حکومت،وفاقی و صوبائی سطح پر ہیلتھ کئیر ورکرز کو اولین ترجیح میں رکھتی ہے۔