جلد کوجواں اور شاداب رکھنے کے لیے دنیا بھر میں خواتین اور حضرات جلد کے قدرتی سکن کیئر پراڈکٹس استعمال کرتے ہیں لیکن کیا آپ جانتے ہیں کہ یہی کام آپ گھر میں موجود ایک عام غذا سے بھی لے سکتے ہیں اور وہ ہے شہد۔

شہد کو ایک مکمل غذا اور بہترین دوا کے طور پر صدیوں سے استعمال کیا جارہا ہے۔ لیکن اس کے لیے شہد کا اصلی ہونا نہایت ضروری ہے۔

کچے نامیاتی شہد میں انزائمز، قدرتی اینٹی بیکٹیریل خصوصیات اور پروبائیوٹکس ہوتے ہیں جو جلد کے لیے بہترن تصور کیے جاتے ہیں یہی وجہ ہے کہ یہ آپ کے چہرے کی صفائی کا ایک سستا قدرتی متبادل ہے۔

شہد کے فوائد:

شہد اپنے قدرتی تیل کو جلد میں اتارے بغیر نرمی سے ہرطرح کے میل کو دور کرتا ہے۔

شہد میں قدرتی پروبائیوٹک اور اینٹی بیکٹیریل خصوصیات ہوتی ہیں، جو مہاسوں کو کم کرنے میں مدد کرتی ہیں۔

شہد ہر طرح کی جلد کے لیے موزوں ہے یہ چکنی جلد کو متوازن کرنے اور خشک جلد کو نمی فراہم کرنے میں مدد کرتا ہے۔

کوشش کریں کہ چہرے جو صاف کرنے کے لیے نامیاتی شہد استعمال کریں، اس کے لیے سب سے پہلے اپنے چہرے کو گرم پانی سے گیلا کریں پھر اپنے ہاتھوں میں شہد کی تھوڑی سی مقدار دونوں ہاتھوں کو ایک ساتھ رگڑیں، اب اسے چہرے پر لگا کر ہلکے ہاتھوں سے دائروں کی صورت میں مساج کریں، چہرے کے مساموں کی گہرائی سے صفائی کے لیے اسے چہرے پر 5 سسے 10 منٹ تک لگا رہنے دیں، نیم گرم پانی سے چہرہ دھولیں۔