دنیا بھر کے ماہرین بہتر صحت کے لیے متوازن غذا، بھرپور نیند، جسمانی سرگرمی اورورزش پر زور دیتے ہیں۔ اور اگر صرف ورزش ہی کی بات کی جائے تو یہ ایک ایسا حیرت انگیز عمل ہے جس کی افادیت گاہے بگاہے سامنے آتی رہتی ہے۔ یہاں پر نیند کی حوالے سے ورزش کی اہمیت بیان کی جارہی ہے۔

دنیا بھرکی ایک بڑی آبادی نیند کی کمی یا بے خوابی کا شکار ہے۔ اور وہ اس کے لیے کئی طرح کے طریقے بھی اپناتی ہیں۔ نیند کی کمی نہ صرف آپ کو دن بھر تھکاوٹ کا احساس دلاتی ہے جبکہ طویل مدت تک نیند کی کمی یا اس میں خلل صحت کو بھی متاثر کرتا ہے اور اس طرح کئی دائمی بیماریوں کا سبب بن سکتا ہے جن میں بلڈ پریشر اور امراض قلب شامل ہیں۔

بہتر نیند کے لیے جو طریقے اختیار کیے جاتے ہیں ان کی طویل فہرست موجود ہے جن میں شام کو غسل کرنے سے لے کر سونے سے چند گھنٹے پہلے اسکرین کے استعمال سے گریز کرنا شامل ہے۔

تاہم حالیہ تحقیق کے مطابق باقاعدگی سے ورزش کرنا نیند کے معیار کو بہتر بنانے میں اہم کردار ادا کرتا ہے۔

مثال کے طور پر، 2015 کے ایک میٹا تجزیہ جس نے نیند کے معیار، دورانیہ اور ورزش کے بارے میں تمام موجودہ تحقیقات کا تجزیہ کیا جس کے نتائج کے مطابق قلیل مدتی اور باقاعدہ ورزش (ہفتے میں چند سیشن) دونوں بہتر نیند کا باعث بن سکتے ہیں۔

اس کا مطلب یہ ہے کہ نیند کے معیار اور دورانیہ کو بہتر بنانے کے لیے ورزش کی ایک مشق بھی کافی ہو سکتی ہے۔

ساتھ ہی تحقیق یہ بھی بتاتی ہے کہ کونسی قسم کی ورزش نیند کو بہتر بنانے میں مددگار ثابت ہوسکتی ہے۔ مثال کے طور پر، باقاعدگی سے ایروبک ورزش لوگوں کو جلدی سونے، رات کو کم جاگنے اور اگلی صبح زیادہ آرام محسوس کرنے میں مدد کرتی ہے۔

 ایروبک ورزش کی بہت سی اقسام ہیں جیسے سائیکل چلانا دوڑنا اور تیز چلنا شامل ہے۔ یہ اتنی کار آمد ہے کہ اس کا صرف ایک، 30 منٹ کا سیشن نیند کے متعدد پہلوؤں کو بہتر بنا سکتا ہے۔

اگرچہ تحقیق سے واضح ہے کہ ورزش ہماری نیند کو بہتر بنا سکتی ہے، لیکن سائنس دان ابھی تک مکمل طور پر اس بات کا تعین نہیں کرسکے کہ یہ کیسے کرتا ہے- حالانکہ ان کے پاس اس حوالے سے کچھ نظریات بھی ہیں۔

ہمارے جسم میں سونے یا جاگنے کا چکر تقریباً 24 گھنٹے پر محیط ہوتا ہے، جسے جسم کی اندرونی ‘گھڑی’ جسے حیاتیا تی گھڑی کہاجاتا ہے کے ذریعے کنٹرول کیا جاتا ہے۔

اس سائیکل کے حصے کے طور پر، میلاٹونن نامی ایک ہارمون شام کو خارج ہوتا ہے، جو ہمیں تھکاوٹ محسوس کرنے میں مدد کرتا ہے۔ دن کے وقت ورزش شام کے وقت میلاٹونن کے پہلے اخراج کا باعث بن سکتی ہے، یہی وجہ ہے کہ ورزش کرنے والے لوگ جلدی سو جاتے ہیں۔