ہر ایک کی یہی خواہش ہوتی ہے کہ وہ نہ صرف سدا جواں رہے بلکہ ایک صحت مند زندگی بھی گزارے، تاہم بہت سے عوامل ایسے ہوتے ہیں جو خواہش کی تکمیل میں رکاوٹ کا سبب بنتے ہیں ان میں سر فہرست غذا کا متوازن نہ ہونا ہے۔

اگر ابتدا ہی سے متوازن غذا کا استعمال کیا جائے تو انسان نہ صرف صحت مند رہتا ہے بلکہ عمر رسیدگی کے اثرات بھی دیر سے نمایاں ہوتے ہیں۔

یہاں پر ایک ایسے ہی مشرو ب کا بنانے کا طریقہ بیان کیا جارہا ہے جو جلد کو تازگی فراہم کر کے بصارت کو بھی بہتر بنائے گا۔

اس مشروب کا بنیادی جز شکرقندی ہے۔ جس کا نام  سن کر آپ یقیناً حیران ہوں گے کہ اس کا ذائقہ کیسا محسوس ہوگا تاہم  دیگر سبزیوں کے ساتھ مل کر یہ ایک خوش ذائقہ اور بے حد صحت بخش مشرو ب تیار ہوگا۔

شکر قندی میں بیٹا کیروٹین اور پوٹاشیم کے حصول کا ایک مؤثرذریعہ ہے، جبکہ یہ جسم میں بآسانی وٹامن اے میں تبدیل ہوجاتا ہے یہی وجہ ہے کہ شکر قندی صحت مند جلد اور بینائی کے لیے ایک مفید سبزی تصور کی جاتی ہے۔

اجزاٗ:

اس مشروب کو بنانے کے لیے جو اجزاء درکار ہیں ان میں ایک درمیانے سائزکی شکر قندی، دو گاجریں، دوسیلری یعنی اجوائن کے پتے، ڈیڑھ انچ ادرک کا ٹکڑا اور دوشملہ مرچ شامل ہیں۔

ہدایات:

تمام اجزاء کو جوسر میں ڈال کر اچھی طرح بلینڈ کریں۔ لیجئے صحت بخش مشروب تیار ہے۔