مدتِ حمل خود ماں اور اس کی اولاد کے لیے ایک نہایت اہم اور نازک مرحلہ ہوتا ہے۔ بدقسمتی سے کم علمی اور توہمات کی وجہ سے خواتین کو مسلسل آرام کا کہا جاتا ہے یا پھر دو جانوں کا حوالہ دے کر زبردستی کھلایا پلایا جاتا ہے۔

 پاکستانی اور بین الاقوامی ڈاکٹر روایتی توہمات کو رد کرتے ہوئے یہ اہم مشورے دے رہے ہیں جن پر عمل کرنے سے غیرمعمولی فوائد حاصل ہوسکتےہیں۔

آرام نہیں، بلکہ کچھ کام

بہت ضروری ہے کہ حاملہ خواتین روزانہ 30 منٹ ہلکی پھلکی واک ضرور کریں۔ اس سے زچہ و بچہ تندرست رہتے ہیں ۔ ناروے میں تحقیق سے معلوم ہوا ہے دورانِ حمل درمیانے درجے کی محنت سے بچے کے پھیپھڑے مضبوط رہتے ہیں۔

پانی کی وافر مقدار اور پانچ کھانے

حاملہ خواتین پانی زیادہ سے زیادہ پئیں اور پورے دن میں پانچ سے چھ دفعہ وقفے وقفے سے صحت و غذائیت بھرے کھانے کھائیں۔ کھانے میں پھلوں اور سبزیوں کا مناسب استعمال کریں۔

خود سے دوا نہ کھائیں

دورانِ حمل سنی سنائی یا ازخود تجویزکردہ تمام ادویہ سے اجتناب ضروری ہے۔ یاد رہے  کہ ہر دوا کی اپنی کیمیائی ساخت ہوتی ہے جو آپ کو نقصان پہنچاسکتی ہے۔

کیلشیئم کا استعمال

پاکستان میں عام خواتین 50 فیصد اور حاملہ خواتین 58 فیصد کم کیلشیئم استعمال کرتی ہیں۔ اس لیے ضروری ہے کہ کیلشیئم سے بھرپور غذاؤں کا بطورِ خاص استعمال کیا جائے۔ کیلشیئم جیسی جادوئی معدن آپ اور آپ کے بچے کے لیے یکساں مفید ہے۔

بچے کو اپنا دودھ پلائیں

عالمی ادارہ برائے صحت کے مطابق صرف ماں کا دودھ ہی نومولود بچے کی مکمل غذا ثابت ہوا ہے۔ اسی لیے بچے کو صرف اور صرف ماں کا دودھ ہی پلایا جائے۔

حال ہی میں قبل ازوقت پیدائش والے سینکڑوں بچوں پر ایک سروے کیا گیا ہے جس سے انکشاف ہوا ہے کہ ماں کا دودھ ایسے بچوں کے اندرونی پیدائشی نقائص کو دور کرتے ہوئے ان کے دل کو ڈرامائی طور پر مضبوط بناتا ہے۔