سرطان یا کینسر کا شمار دنیا میں سب سے زیادہ پائے جانے والے امراض میں ہوتا ہے اور اب اس کے تیزی سے پھیلنے کی اہم وجہ دریافت کی گئی ہے۔

امریکا میں ہونے والی ایک نئی طبی تحقیق میں موٹاپے اور کینسر کے خطرے کے درمیان تعلق کی وضاحت کی گئی ہے کیونکہ موٹاپا کے نتیجے میں لوگوں میں کینسر کا خطرہ بڑھ رہا ہے۔

اس تحقیق کے نتائج جرنل پروسیڈنگز آف دی نیشنل اکیڈمی آف سائنسز میں شائع ہوئے ہیں۔

بوسٹن چلڈرنز ہاسپٹل کی تحقیق میں بریسٹ کینسر پر توجہ مرکوز کی گئی اور محققین نے ایسے شواہد فراہم کیے جن سے ثابت ہوا کہ موٹاپے سے خوابیدہ رسولیوں تک خون کی فراہمی کا عمل شروع ہوجاتا ہے جس سے ان کی نشوونما ہونے لگتی ہے۔

محققین کا کہنا تھا کہ جب کسی رسولی تک خون پہنچنے لگتا ہے تو اس کی نشوونما تیز ہوجاتی ہے۔

اس تحقیق میں چوہوں پر تجربات کیے گئے تھے اور محققین کو رئیل ٹائم میں رسولی کی نشوونما کا مشاہدہ کرنے کا موقع ملا۔

اس کے بعد لیبارٹری میں تجربات کے دوران محققین نے دریافت کیا کہ موٹاپے کے شکار چوہوں میں موجود چربی کے خلیات ایسے مرکبات کو زیادہ مقدار میں بناتے ہیں جو رسولیوں کو خوابیدہ پوزیشن سے باہر نکال کر متحرک کردیتے ہیں۔

اس سے قبل اگست میں جرنل دی لانسیٹ میں شائع تحقیق میں بتایا گیا کہ کینسر کی ایسی اقسام سے اموات کی شرح دنیا بھر میں بڑھ رہی ہے جن کی روک تھام آسانی سے ممکن ہے۔

تحقیق میں دریافت کیا گیا کہ تمباکو نوشی، الکوحل کا استعمال یا زیادہ جسمانی وزن کینسر کا شکار بنانے والے 3 سب سے بڑے عناصر ہیں۔

محققین کے مطابق نتائج سے ثابت ہوا کہ عالمی سطح پر کینسر کے بیشتر کیسز کی روک تھام ممکن ہے جبکہ جلد تشخیص اور مؤثر علاج کے ذریعے بھی اموات کی شرح کو کم کیا جاسکتا ہے۔

محققین نے تسلیم کیا کہ تمباکو نوشی اور الکحل سے گریز، صحت مند جسمانی وزن کو برقرار رکھنا، سورج کی روشنی میں بہت زیادہ گھومنے سے بچنا اور متوازن غذا سے اس موذی مرض کے خطرے کو کم کیا جاسکتا ہے۔