موسم سرما اپنے ساتھ کئی سو غاتیں کے آتا ہے ان میں کئی طرح کے پھل، سبزیاں اورخشک میوہ جات شامل ہیں سرد موسم میں گریاں کھانے کا اپنا ہی ایک لطف ہے یوں تو تمام ہی میوہ جات اپنے ذائقہ اور صحت بخش اجزاء کی وجہ سے کافی مشہور ہیں ان ہی میں انجیر بھی شامل ہے۔

انجیر کو جنت کا پھل کہا جاتا ہے ۔ یہ ایک بے حد صحت بخش پھل ہے اس میں وہ تمام اجزاء پائے جاتے ہیں جو انسان کو صحت مند رکھنے اور بیماریوں سے تحفظ دینے کلیدی کردار ادا کرتے ہیں۔

یہ پھل سارا سال آسانی ہر جگہ دستیاب ہوتا ہے، انجیر کمزور افراد کے لئے ایک بیش بہا نعمت ہے اس کا باقاعدگی سے استعمال کمزور افرادکو فربہ بناتا ہے، یہ جسم میں انسولین کی مزاحمت کو کم کرتی ہے اس طرح خون میں چینی سطح اعتدال میں رہتی ہے انجیر کی تاثیر گرم ہوتی ہے اسی لیے موسم سرما میں اس کا استعمال جسم کو گرم رکھ سرد موسم کے امراض سے تحفظ دیتا ہے۔

ایسے افراد جن میں سیلینیم نامی مرکب کی کمی ہو جاتی ہے تو ان میں میٹھے کھانے کی طلب بڑھ جاتی ہے انجیر میں سیلینیم پایا جاتا ہے اس کا باقاعدہ استعمال میٹھے کی طلب سے چھٹکارا دلانے میں اہم کردار ادا کرسکتا ہے ۔ غرض انجیر ایک سدا بہار پھل ہے جس کے فائدے بھی لاتعداد ہیں۔ اس مختصر خبر میں جانئے کہ انجیر کس طرح ایک سپرفوڈ ہے۔

قبض دور کرنے کی بہترین قدرتی دوا

انجیر قبض کشا میوہ ہے جس کی افادیت تاریخی لحاظ سے ثابت ہوچکی ہے۔ رات کو انجیر کے دو دانے پانی میں بھگودیں اور صبح نہار منہ چباکرکھالیں۔ چند روز میں ہی قبض دور ہوجائے گا۔

جوڑوں اور ہڈیوں کے درد کو دور کرے

انجیر جوڑوں اور ہڈیوں کے درد دورکرنے کا بہترین علاج ہے۔ اس کا طریقہ یہ ہے کہ دو دانے انجییر زیتون کے تیل میں رات بھر بھگو کر رکھیں اور صبح نہار منہ خوب چباکر کھالیں۔ چند ہی روز میں پٹھوں کا کھنچاؤ، ہڈیوں کا درد، اینٹھن اور جوڑوں کا درد واضح طور پر کم ہوجائے گا۔

 بلڈ پریشر کے خاتمے کا بہترین نسخہ

انجیر کے استعمال سے بلڈ پریشر معمول پر رہتا ہے۔ اس کی وجہ یہ ہے کہ انجیر پوٹاشیئم سے مالامال ہوتی ہے۔ پوٹاشیئم دورانِ خون کو باقاعدہ رکھنے میں مددگار ہوتا ہے۔

ماہرین انجیر کو بھگوکر کھانے کا مشورہ اس لیے دیتے ہیں کہ عموماً خشک انجیر ملتی ہے جس میں سے 80 فیصد پانی ختم ہوچکا ہوتا ہے۔ اس لئے ضروری ہے کہ انجیر کو پانی میں بھگوکر استعمال کیا جائے۔

انجیر اور آنتوں کی صفائی

انجیر آنتوں کی صفائی میں بہترین کردار ادا کرتی ہے۔ یہ ڈی ٹاکسفکیشن کا عمل تیز کرتی ہے اور یوں پورے نظامِ ہاضمہ کو طاقتور بناتی ہے۔

انجیر دل کے لیے مفید

انجیرکا باقاعدہ استعمال دل کو مضبوط اور توانا رکھتا ہےاس میں موجود کئی طرح کے اجزا دل کو تندرست رکھتے ہیں۔