دنیا بھر میں ایسے افراد کی کمی نہیں ہے جو اکثر بیٹھے بیٹھے سوجاتے ہیں، یہاں تک کہ کچھ لوگ اپنے کمپیوٹر یا ڈیسک ٹاپ پر کام کرتے ہوئے بھی نیند لینے لگتے ہیں، لیکن کیا آپ اس طرح سونے کے نقصانات سے واقف ہیں؟

اس طرح سونے سے وقتی آرام ضرور ملتا ہے تاہم یہ کمر میں شدید درد، گردن اور کندھوں میں اکڑن کا باعث بن سکتا ہے اس کی وجہ ہے کہ نیند کی حالت میں بہت دیر تک بیٹھ کر سونا جس میں کسی قسم کی حرکت نہ ہوجسم اس طرح کے عمل کا عادی نہیں ہوتا ہے نتیجہ جسم میں درد کے صورت میں سامنے آتا ہے۔

یہ بات سب ہی جانتے ہیں کہ زیادہ دیر تک بیٹھنا صحت پر منفی اثرات مرتب کرتا ہے تاہم بیٹھ کر میزپر سرجھکا کر سونے سے جوڑوں پر بہت زیادہ اثر پڑ سکتا ہے یہ سخت ہوسکتے ہیں، جبکہ یہ مختلف بیماریوں جیسے ڈیپ وین تھرومبوسس کا خطرے کو بھی بڑھا سکتا ہے۔ یہ خون کی گردش کو متاثر کر کے نقل و حرکت کو محدود کر سکتا ہے، جس سے مزید پیچیدگیاں پیدا ہو سکتی ہیں۔

بے حرکت اور ایک ہی پوزیشن میں رہنے سے ریڑھ کی ہڈی پربھی بوجھ بڑھتا ہے اس کے لیے  اسٹریچنگ ایک بہترین ورزش ہے جو ہڈیوں کی لچک اور جوڑوں کی سختی کو روکنے میں مددفراہم کرتی ہے۔

قلیل مدتی مسائل کے علاوہ، بیٹھ کر سونا آپ کو ڈیپ وین تھرومبوسس میں بھی مبتلا کر سکتا ہے ایسا اس وقت ہوتا ہے جب خون جسم کی ایک یا زیادہ رگوں، خاص طور پر ٹانگوں میں جمنا شروع ہوجاتا ہے۔ یہ ایک ہی پوزیشن میں طویل دورانئے تک بیٹھنے یا بیٹھ کرسونے کے نتیجے میں سامنے آتا ہے۔

 اگردرست وقت میں اس مرض کی تشخیص اور علاج نہ کیا جائے تو یہ مزید پیچیدہ ہوسکتا ہے۔ یہ مرض کسی بھی عمر کے فرد کو متاثر کرسکتا ہے اگر وہ دن بیٹھ کر یا بیٹھے ہوئے سوکر گزارتے ہیں، اس کی علامات میں پٹھوں، ٹخنوں یا پاؤں میں سوجن اور درد، سوزش کے نتیجے میں سرخ، گرم جلد، ٹخنوں یا پاؤں میں اچانک دردشامل ہیں۔

کیا سیدھا بیٹھ کر سونے کا کوئی فائدہ ہے؟

اگر آپ بیٹھتے ہوئے سونا چاہتے ہیں تو ہمیشہ ریکلائنر کا سہارا لینے کا مشورہ دیا جاتا ہے۔ اگرچہ اس پوزیشن میں بھی سونے سے گریز کرنا چاہئے۔ لیکن یہ حاملہ خواتین کے لیے فائدہ مند ہو سکتا ہے، جس کے لیے لیٹ کر سونے میں دشواری ہوتی ہے۔

 ایسے افراد جن میں لیٹ کر سونے سے سانس میں خلل پیداہوتا ہے اس طرح نیند کی کمی کے شکارافراد کے لیے سونے کا ایک بہترین طریقہ بھی ہے، یہ ایسڈ ریفلکس کو بھی کم کر سکتا ہے اور معدے کے مسائل سے نمٹنے والے لوگوں کو زیادہ مؤثر طریقے سے سونے میں مدد کر سکتا ہے۔