سیب ایک انتہائی خوش ذائقہ اور صحت بخش پھل ہے جو دنیا بھر میں پیدا ہوتا ہے سیب کے لیے ایک بات بہت ہی مشہور ہے کہ اگر آپ امراض سے بچنا چاہتے ہیں تو ایک سیب روزکھانا اپنی عادت بنالیں مگر کس رنگ کا؟

یہ بات درست ہے رنگ پھلوں کی غذائیت پر اثر انداز ہوتے ہیں یہی وجہ ہے کہ سیب کے رنگ کے بارے میں کافی شش و پنج پایا جاتا ہے کہ کونسے رنگ کا سیب کھایا جائے۔

اصل میں دونوں ہی رنگ کے سیب غذائیت، وٹامنز اور کیلوریز سے بھرپور ہوتے ہیں تاہم ان میں رنگ کے علاوہ غذائیت کے حوالے سے بھی فرق موجود ہوتا ہے۔ یہاں پر دونوں رنگوں کے سیب کے بارے میں آگاہ کیا جارہا ہے۔

سبز سیب

سبز سیب ذائقے میں کھٹے ہوتے ہیں اور اس کا چھلکا قدرے موٹا ہوتا ہے جو اسے مزید خستہ بناتا ہے۔ سبز میں سیب سرخ سیب کی نسبت وٹامن اے، وٹامن بی، وٹامن سی، وٹامن ای اور وٹامن کے، آئرن، پوٹاشیم اور پروٹین کی مقدار زیادہ موجود ہوتی ہے اسی طرح اس میں فائبرزیادہ لیکن چینی اورکاربوہائیڈریٹس کم ہوتے ہیں۔

سرخ سیب

سرخ سیب دنیا میں بھر سیب کی 7500 معروف اقسام میں سے ایک قسم ہے۔ یہ اپنے لذیذ ذائقہ کی وجہ سے کافی شہرت رکھتا ہے۔

سرخ سیب نہایت میٹھا اور رس دار ہوتا ہے یہ سبز سیب کی نسبت قدرے سخت جبکہ اس کا چھلکا پتلا رسیلا اور سرخ ہوتا ہے۔

اس سیب کے چھلکے کی سرخ رنگت اینتھوسیانین نامی خاص جز کی وجہ سے ہوتی ہے سرخ سیب میں غذائیت سبز سیب سے کم ہوتی ہے لیکن اس میں چینی بشمول اینٹی آکسیڈنٹس کی مقدار زیادہ ہوتی ہے۔