آلو دنیا میں سب سے زیادہ کھائی جانے والی ایک صحت بخش سبزی ہے جسے بچے اور بڑے سب ہی شوق سے کھاتے ہیں۔ جس طرح اسے شوق سے کھا یا جاتا ہے اسی تناسب سے اسے پکوانوں میں استعمال کیا جاتا ہے۔

 آلو سے بنائے جانے والے تمام پکوان اپنے اندر ایک انفردیت رکھتے ہیں اور اس سبزی کی بدولت اس میں چار چاند لگ جاتے ہیں بلکہ بات یہی ختم نہیں ہوتی اس سے بنائے جانے والے کچھ پکوان ایسے ہیں جس کے سامنے گوشت سے بنائے گئے کھانے بھی پھیکے معلوم ہوتے ہیں ۔ انہیں میں آلو کا قورمہ بھی شامل ہے ۔

یہ نہ صرف بہت کم وقت میں تیار ہو جاتا ہے بلکہ کھانے میں بھی نہایت مزیدار ہوتا ہے ۔ تو جانتے ہیں کہ اسے کیسے تیار کیا جاتا ہے ۔

اجزا:

آلو آدھا کلو

پیاز ایک عدد

ٹماٹر ایک عدد

بادام چھ عدد

دہی آدھا کپ(سو گرام)

لہسن ادک کا پیٹ ایک کھا نے کا چمچ

پسی لال مرچ ایک چائے کا چمچ

پسا دھنیا ایک کھانے کا چمچ

ہلدی آدھا چائے کا چمچ

تیز پات دو عدد

ثابت لال مرچ دو عدد

لونگ چھ عدد

کالی مرچ چھ عدد

جاوتری ایک چھوٹا ٹکڑا

سبز لائچی دو عدد

ثابت زیرہ ایک چائے کا چمچ

دارچینی ایک انچ کا ٹکڑا

نمک ایک چائے کا چمچ یا حسب ذائقہ

تیل ایک کپ

ترکیب:

سب سے پہلے ایک کڑاہی میں آدھا کپ تیل ڈال کر اس میں پیاز فرائی کر کے بگھار تیار کرلیں ۔ اب آلو کو چھیل چھوٹے چھوٹے ٹکڑے میں کاٹ کر تیز آنچ پر تین منٹ تک ہلکا ابال لیں ، تاکہ اس کی سختی دور ہو جائے ۔ اب آلو کو پانی سے نکال کر چھلنی سے چھان لیں ۔ بگھار والے تیل ہی میں آلو ڈال کر فرائی کریں ے یاد رہے کہ آلو کو ابال کر فوراً ہی تل لیں یہ ٹھنڈے نہیں ہو نے چاہئے، اسے ہلکا گولڈن ہو نے تک فرائی کریں دو سے تین منٹ بعد اسے ایک پلیٹ میں نکال لیں۔

ایک دوسری کڑاہی میں بقیہ بچا ہوا آدھا کپ تیل ڈال کر اس میں زیرہ، تیزپات،لونگ، جاوتری، سبز الائچی، کالی مرچ اور دار چینی ڈال دھیمی آنچ پر پکائیں تاکہ اس کا ذائقہ تیل میں بس جائے۔ اب اس میں ادرک لہسن کا پیسٹ شامل کریں اورپھر ثابت لال مرچ بھی ڈال دیں ایک سے دو منٹ بعد کے بعد اس میں لال مرچ، نمک، پسادھنیا اور ہلدی شامل کر کے اچھی طرح چمچ ہلاتے رہیں تاکہ ان کا کچا پن ختم ہو جائے۔

 اب دہی میں بگھار، ٹماٹراوربادام ڈال کر بلینڈر میں اچھی طرح بلینڈ کر کے اسے بھی کڑاہی میں شامل کر لیں اور چمچ چلاتے رہیں تاکہ یہ جل نہ۔ اسے اتنا پکائیں کہ مصالحہ دانے دار نظر آئے۔ اب اس میں آلو بھی شامل کر کے کچھ دیر تک پکائیں اور گریوی بنانے کے لئے تھوڑا سا پانی ڈال کر دھیمی آنچ پر پکائیں تاکہ اس کا تیل اوپر آجائے۔ اب اسے کسی ڈش میں نکال لیں، اورہرا دھنیاڈال کر پیش کریں لیجئے مزیدار آلو کا قورمہ تیار ہے۔