فلو، نزلہ وزکام کسی بھی موسم میں ہو بے آرامی کا سبب بنتا ہے ایسی صورت میں روزمرہ کے معمولات کو انجام دینا قدرے مشکل ہوجاتا ہے، بہتی ناک، سردی، سردرد اور بخار کی کیفیت میں صحت بری طرح متاثر ہونے لگتی ہے۔

لوگوں کی بڑی تعداد اس کے لیے غیر ضروری ادویات کے بجائے گھریلوعلاج کو ترجیح دیتی ہیں جو سادہ آسان ہونے کے ساتھ کار آمد بھی ہوتے ہیں۔ ویسے تو ادرک اور شہد کے افادیت سے کون واقف نہیں یہ دونوں ہی صحت بخش اجزاء سے بھرپور ہوتے ہیں جو آپ کو کئی امراض سے تحفظ فراہم کرکے صحت مند رکھتے ہیں تاہم جب ان دونوں کو ملایاجاتا ہے تو ان کی افادیت کئی گنا بڑھ جاتی ہے یہاں پر ان دونوں کو ملاکر ایک کینڈی تیار کی جارہی جو فلو اور اور گلے کی خراش میں مفید ثابت ہوگی۔

ادرک

ادرک کا استعمال صدیوں سے کھانوں میں مصالحہ اور کئی امراض میں بطور دوا کیا جارہا ہے۔ دنیا کے تقریباً تمام ہی نمکین پکوان کی تیاری میں ادرک لازمی جز ہے۔

تاہم سائنسی تحقیق کی بدولت ادرک کی ایسی افادیت سامنے آئی ہے جس نے اسے سپر فوڈ کی فہرست میں شامل کردیا ہے۔ ادرک کو تازہ اور خشک  جسے سونٹ کہا جاتا ہے دونوں طرح سے استعمال کیا جاتا ہے۔

ادرک میں کئی صحت بخش اجزاءکے ساتھ جراثیم کش خصوصیات پائی جاتی ہیں اسی لیے اسے کئی امراض میں بہترین دوا کا درجہ حاصل ہے۔

ادرک اپنے صحت بخش اجزاء کی بدولت مدافعتی نظام کومضبوط بنانے، جسم کی اندرونی سوزش کو کم کرنے کے ساتھ نظام انہضام کو بہتربناتی ہے۔

شہد

ایک ایک مکمل غذا اور بہترین دوا ہے سپر فوڈ میں شامل اس غذا میں اینٹی بیکٹیریل خصوصیات کے ساتھ اینٹی آکسیڈینٹس کی کثیر مقدار پائی جاتی ہے جو آپ کو کئی امراض سے تحفظ فراہم کرتی ہے۔ یہ جلد اور بالوں کے بھی کئی مسائل کو حل کرنے کی صلاحیت رکھتا ہے۔

کینڈی بنانے کے اجزاء:

اس کینڈی کو بنانے کے جو اجزاء درکار ہیں ان میں آدھا کپ پانی، آدھا کپ چینی، دو کھانے کے چمچ شہد، دو کھانے کے چمچ ادرک کا پیسٹ اور ایک چوتھائی چائے چمچ دارچینی شامل ہیں۔

ترکیب:

ایک پین میں چینی، پانی، شہد، ادرک اور دارچینی شامل کر کے اچھی طرح مکس کریں اور دھیمی آنچ پر پکائیں  جب یہ گاڑھا ہونے لگے تو اسے اتار کر اس مکسچر کو بٹر پیپرپر ایک چمچ کی مدد سے ڈالتے جائیں اور خشک ہونے پرکسی جار میں محفوظ کر لیں لیجئے مزیدار اور صحت سے بھرپور کینڈی تیار ہے ۔