کافی دنیا کے مشہور ترین مشروبات میں سے ایک ہے جسے دن کے آغاز پر لوگوں کی بڑی تعداد پہلی غذا کے طور پراستعمال کرتی ہے، کچھ لوگ کافی کو بغیر دودھ کے لیتے ہیں تاہم حال میں کی جانے والی ایک تحقیق کے مطابق کافی میں دودھ ملا کر پینا سوزش کو کم کرسکتی ہے۔

محققین کے مطابق دودھ ملی کافی میں پروٹین اور اینٹی آکسیڈنٹس کا مجموعہ مدافعتی خلیوں میں سوزش مخالف خصوصیات کو دوگنا کردیتا ہے۔

جسم میں چوٹ لگنے یا کسی بیکٹیریا کے حملے کی صورت میں جسم کا مدافعتی نظام اس جگہ کی حفاظت کے لئے خون کے سرخ خلیوں کی فوج  بھیجتا ہے جس کے نتیجے میں ظاہری سرخی اور سوجن پیدا ہوتی ہے اسی طرح فلواورنمونیا جیسے انفیکشنزمیں بھی یہ اسی طرح کام کرتے ہیں لہذا سوزش ضروری ہے۔ اگر سوزش نہ ہوتو یہ عام لگنے والی چوٹ اور انفیکشن ٹھیک نہیں ہوں گے۔

پولیفینول کے نامی اینٹی آکسیڈنٹس انسانوں، پودوں، پھلوں اور سبزیوں میں پایا جاتا ہے ہیں۔ اینٹی آکسیڈنٹس کے اس گروپ کو فوڈ انڈسٹری بھی آکسیڈیشن اور کھانے کے معیار برقرار رکھنے اور انہیں خرابی سے بچانے کے لیے استعمال کرتی ہے اور اس طرح غذائیں بے ذائقہ اور بدبودار ہونے سے بچی رہتی ہیں۔ پولیفینول کو انسانوں کے لیے صحت مند بھی کہا جاتا ہے، کیونکہ وہ جسم میں آکسیڈیٹیو تناؤ کو کم کرنے میں مدد کرتے ہیں جو سوزش کو جنم دیتی ہے۔

لیکن پولیفینول کے بارے میں ابھی بہت کچھ جاننا ضروری ہے۔ صرف چند مطالعات نے پولی فینول کے دوسرے مالیکیولز کے ساتھ رد عمل ظاہرکرنے کے بارے میں تحقیق کی ہے۔

تاہم اس نئے مطالعے میں محققین نے تحقیق کی کہ پولیفینول امینو ایسڈ کے ساتھ مل کر کس طرح کا رد عمل ظاہر کرتا ہے جس کے نتائج بے حد امید افزا تھے۔

کوپن ہیگن یونیورسٹی کے فوڈ سائنس ڈیپارٹمنٹ کی پروفیسر ماریانے نیسن لنڈ جو اس تحقیق کی سربراہی کر رہی تھی کا کہنا ہے کہ اس تحقیق میں پولی فینول ایک امینو ایسڈ کے ساتھ رد عمل کو ظاہر کرتا ہے اس طرح مدافعتی خلیوں میں سوزش کو روکنے یا کم کرنے کی صلاحیت میں اضافہ ہوتا ہے۔

اس تحقیق میں چوہوں میں مصنوعی سوزش پیدا کر کے محققین نے پولی فینولز اور امینو ایسڈز کے امتزاج کا مشاہدہ کیااور اسے علاج کے لیے استعمال کیا تو نتائج حیران کن تھے کیونکہ مدافعتی خلیوں نے سوزش سے لڑنے میں دو گنا زیادہ اثر دکھایا۔

اس نتیجے کو سامنے رکھتے ہوئے محققین کا کہنا ہے یہی امتزاج یعنی پولیفینول اور پروٹین کے درمیان رد عمل دودھ کے ساتھ کافی مشروبات میں بھی ہوتا ہے۔

لہٰذا، محققین پر امید ہیں کہ کافی میں دودھ کا استعمال سوزش کو کم کرنے میں معاون ثابت ہوسکتا ہے۔