دنیا بھرمیں لوگوں کی بڑی تعداد دن کا آغازمختلف مشروبات یعنی چائے یا کافی سے کرتی ہے تاہم ماہرین غذائیت چند غذاؤں کو صبح کے لیے صحت بخش قرار دیتے جن کا استعمال آپ کو دن بھر توانا رکھتا ہے۔

چائے یا کافی سے دن کا آغاز کرنا اتنا فائدہ مند نہیں ہوتا ہے اسی لیے اب اسے تبدیل کرنے کی ضرورت ہے یہ بات درست ہے کہ چائے یا کافی میں موجود کیفین آپ کو جگاتی ہے اور ارتکاز بڑھاتی ہے لیکن اس میں اتنے صحت بخش غذائی اجزاء  موجود نہیں ہوتے کہ اسے دن کی پہلی غذا بنایا جائے۔

اسی لیے یہاں 3 صحت سے بھرپور غذاؤں کے بارے میں بتایا جارہا ہے جنہیں صبح غذا میں شامل رکھنا آپ کی صحت کو بہتربناسکتا ہے۔

کیلا

دنیا میں سب زیادہ کھایا جانے والا پھل کیلا ہے یہ نہ صرف انتہائی صحت بخش ہے بلکہ بچے کی پہلی ٹھوس غذا میں بھی کیلا شامل ہے۔ پوٹاشیم سے بھرپور اس پھل میں فائبر، وٹامن بی 6، وٹامن سی، میگنیشیم، کاپر، زنک، میگنیز اور پروٹین کی کثیر مقدار موجود ہوتی ہے۔ اگر آپ کو ہاضمے کے مسائل ہیں یا کھانے کے بعد میٹھے کی خواہش محسوس ہوتی ہے تو اپنے دن کی شروعات کیلے سے کریں۔ ہفتے میں کم از کم 2سے 3 بار ایسا کرنے سے آپ خود کو صحت مند محسوس کریں گے۔

 بھیگی ہوئی کشمش

 کشمش ریشے سے بھرپور ہوتی ہے اور جب اسے پانی میں بھگویا جاتا ہے تو اس میں قبض کو دور کرنے کے والے خواص پیدا ہوجاتے ہیں اس طرح بھیگی ہوئی کشمش کو دن کے آغاز پر کھانے سے قبض سے نجات ملتی ہے اور دن بھر ہاضمہ بہتر رہتا ہے۔

  بھیگے ہوئے بادام

بادام کے چھلکے میں ٹینن نامی جزموجود ہوتا ہے، جو معدے میں غذائیت کے جذب کرنے کی صلاحیت کو محدود کرتا ہے اسی لیے اسے بھگوکر استعمال کرنے سے بادام میں موجود ضروری غذائیت کو بہتر انداز میں جذب کیا جاسکتا ہے۔ اسے صبح نہار منہ کھانا یاداشت کو بہتر بناتاہے۔

ان غذاؤں کے دس سے پندرہ منٹ بعد آپ اپنا معمول کا ناشتہ کرسکتے ہیں۔

نوٹ: یہ مضمون محض معلومات عامہ کے لیے پیش کیا گیا ہے اس پر عمل کرنے سے قبل اپنے معالج سے ضروررابطہ کریں۔