صحت مند رہنے کے لیے وزن کو اعتدال میں رکھنا نہایت ضروری ہے یہی وجہ ہے دنیا بھرمیں لوگ وزن کو کم کرنے اور اسے توازن میں رکھنے کے لیے کئی طرح کی غذائیں استعمال کرتے ہیں انہی میں بیسن بھی شامل ہے۔

ماہرین وزن کم کرنے میں کچھ غذاؤں سے پرہیز اورورزش کرنے کا مشورہ دیتے ہیں جبکہ ساتھ ہی صحت سے بھرغذا جو وزن کم کرنے میں مدد فراہم کرے استعمال کرنے پر زور دیتے ہیں۔

بیسن کا شمار ایسی ہی غذاؤں میں ہوتا ہے جو انتہائی صحت بخش ہونے کے ساتھ وزن کم کرنے میں مدد فراہم کرتا ہے۔

بیسن چنے کی دال کو پیس کرحاصل کیاجاتا ہے اس میں انتہائی صحت بخش اجزاء جیسے فائبر، آئرن، پوٹاشیم، فولیٹ، فاسفورس، کاپر، زنک، میگنیز، کیلشیم، اور وٹامن بی 6 سمیت بہت سے وٹامنز اور منرلز شامل ہوتے ہیں۔

جب کہ ایک کپ بیسن میں تین سو چھپن کیلوریز، بیس گرام پروٹین، چھ گرام فیٹ، اور ترپن گرام کاربو ہائڈریٹس پائے جاتے ہیں۔

بیسن کو وزن کم کرنے اور موٹاپے  سے نجات حاصل کرنے کے لیے بہترین تصور کیاجاتا ہے اس کی وجہ یہ ہے کہ بیسن میں کولیسٹرول اور کیلوریز کافی کم مقدارموجود ہوتے ہیں۔ اس کے علاوہ بیسن کی روٹی شوگر کے مریضوں کے لیے بھی بہترین غذا سمجھی جاتی ہے۔

بیسن میں فائبر کافی مقدار میں پایا جاتا ہے یہی وجہ ہے کہ اگر اسے غذا میں شامل کیاجائےتو یہ دیر تک پیٹ کو بھرا رکھتا ہے اس طرح آپ بے وقت کی بھوک سے بچے رہتے ہیں جو وزن بڑھنے کی ایک بنیادی وجہ ہے۔

اس طرح بھوک کے احساس میں کمی سے لی جانے والی کیلوریز کی مقدار میں کمی واقع ہونے لگتی ہے اور وزن میں کمی آنا شروع ہو جاتی ہے۔ اس کے ساتھ ساتھ بیسن کی روٹی کو تھائی رائیڈز کے لیے بھی بہترین مفید قرار دیا جاتا ہے ۔