خشک میوہ جات میں اخروٹ کا بھی شمار کیا جاتا ہے جو کہ عام طور پر بہت آسانی سے مل جاتا ہے۔

اخروٹ میں تقریباً 70 فیصد تیل ہوتا ہے جو صحت کے لیے مفید ہے، اس کے علاوہ ان میں کاپر کی مقدار بھی کافی ہوتی ہے جو جلد اور بالوں کے قدرتی رنگ کو برقرار رکھنے میں مدد دیتے ہیں۔

آئیے آپکو اخروٹ کھانے کے فوائد بتاتے ہیں۔

اینٹی آکسائیڈنٹس سے بھرپور

اخروٹ میں وٹامن ای، میلاٹونین اور پولی فینولز نامی نباتاتی مرکبات موجود ہوتے ہیں جو صحت کے لیے مفید ہوتے ہیں۔

غذا میں اخروٹ کو شامل کرنے سے تکسیدی تناؤ پر قابو پانے میں مدد ملتی ہے جس سے خون کی شریانوں کے امراض سے بچنے میں مدد ملتی ہے۔

دل کی صحت

خون میں چکنائی یا کولیسٹرول کی مقدار بڑھنے سے امراض قلب، فالج اور دیگر طبی مسائل کا خطرہ بڑھتا ہے۔

روزانہ کچھ مقدار میں اخروٹ کھانے سے کولیسٹرول کی سطح میں کمی آتی ہے۔

یہ بھی پڑھیں: مٹھی بھر اخروٹ کھانے کے 4 گھنٹوں بعد جسم میں کیا تبدیلیاں آتی ہیں؟

اخروٹ کھانے سے امراض قلب کا خطرہ بڑھانے والے متعدد عناصر کی روک تھام ہوتی ہے۔

اخروٹ کھانے سے جسمانی وزن میں کمی آتی ہے، پیٹ نکلنے کا خطرہ کم ہوتا ہے جبکہ بلڈ پریشر اور خون میں چکنائی کی شرح کم ہوتی ہے۔

ذیابیطس کے مریضوں کے لیے مفید

ذیابیطس کے مریضوں یا ہائی بلڈ شوگر کے شکار افراد کو روزانہ اخروٹ کھانے سے امراض قلب میں مبتلا ہونے سے تحفظ ملتا ہے۔

روزانہ اخروٹ کھانے سے خون کی شریانوں کے افعال بہتر ہوتے ہیں جبکہ کولیسٹرول کی سطح کم ہوتی ہے۔

اخروٹ کھانے سے بلڈ شوگر کی سطح کو کنٹرول کرنے میں ممکنہ مدد مل سکتی ہے۔

مردوں میں بانجھ پن کا خطرہ کم ہوتا ہے

اخروٹ کھانے سے مردوں کی تولیدی صحت بھی بہتر ہوتی ہے۔

اخروٹ کھانے سے اسپرمز کی صحت بہتر ہوتی ہے جس سے بانجھ پن کا خطرہ کم ہوتا ہے۔

یہ بھی پڑھیں: کشمش، اخروٹ اور دودھ ملا کر پینے سے جسم میں کیا تبدیلی آتی ہے؟ جانئے

کینسر سے تحفظ

اخروٹ کھانے کی عادت سے معدے کے کینسر سے متاثر ہونے کا خطرہ کم ہوتا ہے۔

اخروٹ میں موجود پولی فینولز سے کینسر کی مختلف اقسام سے متاثر ہونے کا خطرہ کم ہوتا ہے۔

نظامِ ہاضمہ کے لیے مفید

اخروٹ کھانے سے معدے میں صحت کے لیے مفید بیکٹریا کی تعداد میں اضافہ ہوتا ہے جس سے نظام ہاضمہ کی صحت بہتر ہوتی ہے۔

جسمانی ورم میں کمی

جسمانی ورم متعدد امراض بشمول ذیابیطس ٹائپ 2، الزائمر اور کینسر کا باعث بنتا ہے۔

اخروٹ میں موجود پولی فینولز جسم میں تکسیدی تناؤ اور ورم سے مقابلہ کرتے ہیں جبکہ دیگر نباتاتی مرکبات بھی جسمانی ورم میں کمی لاتے ہیں۔

جسمانی وزن میں کمی

اخروٹ میں کیلوریز کی مقدار زیادہ ہوتی ہے مگر اعتدال میں رہ کر اسے کھانے سے جسمانی وزن میں کمی لانے میں مدد ملتی ہے۔

اخروٹ کھانے سے کھانے کی اشتہا کم ہوتی ہے جس سے جسمانی وزن میں کمی لانا آسان ہوتا ہے۔

یہ بھی پڑھیں: سرد موسم میں ’اخروٹ‘ اُبال کر استعمال کرنے سے کیا ہوتا ہے؟