آج ہم آپکو رمضان کے دوران تھکاوٹ اور سستی سے بچانے کے مددگار طریقے بتائیں گے۔

سحری لازمی کریں

روزہ رکھنے والے فرد کو روزمرہ کے کاموں کے لیے توانائی کی ضرورت ہوتی ہے اور افطار تک کچھ کھانا پینا ممکن نہیں ہوتا تو سحری جسمانی توانائی کو برقرار رکھنے کے لیے اہم ہے۔

سحری میں صحت کے لیے مفید غذاؤں کا استعمال دن بھر توانائی برقرار رکھنے میں مدد فراہم کرتا ہے جس کے باعث تھکاوٹ کا احساس طاری نہیں ہوتا۔

مختصر قیلولہ

جسمانی صحت کے لیے نیند بہت اہم ہوتی ہے اور عموماً رمضان کے مہینے میں نیند کا دورانیہ گھٹ جاتا ہے۔

دوپہر میں 20 سے 30 منٹ کے مختصر قیلولے سے رات کی نیند کی کمی کو کچھ حد تک پورا کرنے میں مدد ملتی ہے۔

یہ بھی پڑھیں: کیا آپ بھی ہمیشہ تھکاوٹ محسوس کرتے ہیں تو کہیں اس کی وجہ یہ تو نہیں

اس مختصر نیند سے جسمانی توانائی میں اضافہ ہوتا ہے، البتہ دن میں زیادہ وقت تک سونے سے گریز کریں کیونکہ اس سے سستی اور تھکاوٹ کا احساس مزید بڑھ سکتا ہے۔

مناسب مقدار میں پانی کا استعمال اور سورج کی روشنی میں زیادہ گھومنے سے گریز

روزے کے دوران پانی کی کمی یا ڈی ہائیڈریشن سے بچنا بہت اہم ہوتا ہے۔

پانی کی کمی سے سردرد، سستی اور تھکاوٹ جیسے احساسات کا سامنا ہوتا ہے تو یہ ضروری ہے کہ افطار سے سحر تک مناسب مقدار میں پانی پینا عادت بنائیں۔

اسی طرح سورج کی روشنی میں زیادہ وقت تک گھومنے سے گریز کریں تاکہ جسم پانی کی کمی کا شکار نہ ہو۔

افطار میں بہت زیادہ کھانے سے گریز کریں

کچھ افراد افطار میں ضرورت سے زیادہ کھا لیتے ہیں جس کے نتیجے میں سستی، پیٹ میں تکلیف اور نظامِ ہاضمہ کے مسائل کا سامنا ہوتا ہے۔

افطار میں غذا کی مقدار پر نظر رکھیں اور ایسی غذاؤں کو ترجیح دیں جن کو ہضم ہونے میں زیادہ وقت لگتا ہے تاکہ جسم کو توانائی فراہم ہوتی رہے اور تھکاوٹ کا سامنا نہ ہو۔

پورا دن آرام کرنے سے گریز کریں

جسم کو توانائی کی سطح کو برقرار رکھنے کی ضرورت ہوتی ہے اور دن بھر کچھ کیے بغیر آرام کرنے سے یہ سطح گھٹ جاتی ہے۔

یہ بھی پڑھیں: دن بھر بیٹھنے کے باوجود بیشتر افراد کو تھکاوٹ کا سامنا کیوں ہوتا ہے؟ نئی تحقیق سامنے آگئی

یہی وجہ ہے کہ روزمرہ کے امور سرانجام دینے سے جسمانی توانائی کو مستحکم رکھنے میں مدد ملتی ہے۔