تھکاوٹ اور جسمانی توانائی میں کمی کا مسئلہ بہت عام ہوتا ہے لیکن چند عام طریقوں سے جسمانی توانائی کو بڑھانا ممکن ہے۔

تو ان طریقوں کے بارے میں جانیں جو جسمانی توانائی کو بہتر بنانے کے لیے مؤثر ثابت ہوتے ہیں۔

جسمانی سرگرمیاں

تھکاوٹ کے شکار ہونے کے بعد ورزش کرنا بہت مشکل محسوس ہوتا ہے مگر جسمانی سرگرمیوں سے جسمانی توانائی میں اضافہ ہوتا ہے۔

ورزش کرنے سے زندگی کا معیار بڑھتا ہے اور زیادہ متحرک ہونے سے خود اعتمادی بھی بڑھتی ہے۔

ورزش کرنے سے دل، پھیپھڑوں اور مسلز کے افعال زیادہ بہتر ہوتے ہیں اور جسمانی توانائی میں اضافہ ہوتا ہے۔

یوگا

ہر ہفتے ایک بار یوگا کرنے کے عادی افراد کی جسمانی توانائی میں اضافہ ہوتا ہے۔

پانی

جسم میں پانی کی کمی توانائی کو چوس لیتی ہے جبکہ جسمانی کارکردگی بھی متاثر ہوتی ہے۔

ڈی ہائیڈریشن سے ایتھلیٹس کے لیے وزن اٹھانے کی ورزشیں کرنا مشکل ہو جاتا ہے۔

جسم میں پانی کی کمی سے تھکاوٹ بڑھتی ہے اور روزمرہ کے کام کرنا بھی مشکل ہو جاتا ہے۔

مناسب نیند

نیند کی کمی سے دن میں تھکاوٹ اور غنودگی جیسی علامات کا سامنا ہوتا ہے اور اس کا حل رات کی اچھی نیند ہے۔

اچھی نیند سے لوگوں کو تھکاوٹ کا کم سامنا ہوتا ہے جبکہ صحت بھی بہتر ہوتی ہے۔

مچھلی

مچھلی کھانے سے دل کی صحت بہتر ہوتی ہے جبکہ اس میں موجود اومیگا 3 فیٹی ایسڈز سے ذہن مستعد ہوتا ہے۔

مچھلی کے تیل کے کیپسول کھانے سے بھی جسمانی توانائی میں اضافہ ہوتا ہے۔

جسمانی وزن میں کمی لائیں

جسمانی وزن میں کمی لانے سے توانائی کی سطح بڑھتی ہے۔

درحقیقت جسمانی چربی کی مقدار میں معمولی کمی سے بھی جسمانی توانائی بڑھتی ہے جبکہ مزاج پر خوشگوار اثرات مرتب ہوتے ہیں۔

زیادہ وقت تک بیٹھنے سے گریز کریں

جو لوگ دن بھر زیادہ وقت بیٹھ کر گزارتے ہیں انہیں تھکاوٹ اور جسمانی توانائی میں کمی کے مسئلے کا زیادہ سامنا ہوتا ہے۔

اس کے مقابلے میں ہر گھنٹے میں پانچ منٹ تک چہل قدمی کرنے کی عادت سے خود کو تھکاوٹ سے محفوظ رکھنے اور جسمانی توانائی کو بڑھانے میں مدد ملتی ہے۔