دنیا بھر میں تمباکو نوشی کرنے والوں کی تعداد میں بڑی کمی ہوگئی ہے۔

عالمی ادارہ صحت کی جانب سے جاری کی گئی ایک رپورٹ کے مطابق دنیا میں اب 5 میں سے صرف 1 شخص سگریٹ پی رہا ہے، پاکستان میں 15 سال یا اس سے زائد عمر کے افراد میں تمباکو نوشی کے استعمال کی شرح 16.9 فیصد ہے۔

رپورٹ میں بتایا گیا کہ 150 ممالک ریگولیشن، زیادہ ٹیکس اور دیگر اقدامات کے ذریعے تمباکو کے استعمال کو کامیابی سے کم کر رہے ہیں، تمباکو نوشی کرنے والوں کی تعداد جنوب مشرقی ایشیا اور یورپ میں سب سے زیادہ ہے، مصر، اردن اور انڈونیشیا سمیت چند ممالک میں تمباکو کا استعمال اب بھی بڑھ رہا ہے۔

2000 میں دنیا میں 15 سال یا اس سے زیادہ عمر کے تقریباً 1.36 ارب افراد سگریٹ نوشی کرتے تھے جبکہ 2022 میں یہ تعداد گھٹ کر 1.25 ارب رہ گئی ہے۔

عالمی ادارہ صحت کی رپورٹ کے مطابق تمباکو کا استعمال 2030 تک مزید کم ہو کر 1.2 ارب افراد تک رہ جائے گا۔

دنیا میں اوسطاً 13 سے 15 سال کی عمر کے 10 فیصد افراد تمباکو کی ایک یا زیادہ اقسام کا استعمال کرتے ہیں۔

دنیا بھر میں تمباکو کے استعمال سے ہر سال 80 لاکھ سے زیادہ افراد ہلاک ہوتے ہیں جن میں ایک اندازے کے مطابق 13 لاکھ غیر تمباکو نوشی کرنے والے بھی شامل ہیں۔

واضح رہے کہ سگریٹ نوشی صحت کے دیگر مسائل کے علاوہ کینسر، دل کی بیماری، فالج، پھیپھڑوں کی بیماریاں، ذیابیطس وغیرہ کی بیماریوں کا بھی سبب بنتی ہے۔