وزن کا بڑھنا چاہے بچوں میں ہو یا بڑوں میں نقصان کا باعث بن سکتا ہے جس سے ان میں کئی امراض کا خطرہ بڑھ جاتا ہے تاہم حال ہی میں کی جانے والی ایک تحقیق کے مطابق بچوں میں وزن بڑھنے کی عام وجہ مختلف پھلوں کا رس ہے چاہے وہ تازہ پھلوں کا سو فیصد خالص ہی کیوں نہ ہو۔

حال ہی میں ماضی میں کیے جانے والے 42 مطالعات کا ایک نیا تجزیہ کیا گیا ہے جس کے مطابق روزانہ ایک گلاس یا اس سے زیادہ 100 فیصد پھلوں کا رس پینا بچوں اور بڑوں میں وزن میں اضافے سے منسلک ہے۔

جاما پیڈیاٹرکس میں شائع ہونے والی اس تحقیق میں 100 فیصد پھلوں کا رس پینے اور بی ایم آئی  کے درمیان ایک مثبت تعلق پایا گیا، یہاں 100 فیصد خالص پھلوں کے رس سے مراد ایسا مشروب جس میں چینی کو شامل نہیں کیا گیا ہو وہ بھی بچوں اور بڑوں میں وزن بڑھنے کا باعث بن سکتا ہے۔

اس تجزیہ کے مطابق چھوٹے بچے جن کی عمریں 11 برس سے کم تھی نے بڑے بچوں کے مقابلے میں 100 فیصد پھلوں کے رس کے ہر 8 اونس اضافی سرونگ سے زیادہ بی ایم آئی حاصل کیا۔

اس کا مطلب ہرگز یہ نہیں ہے بچے یا بڑے تازہ پھلوں کے رس کو استعمال کرنا ترک کر دیں، بلکہ مطالعہ میں کہا گیا ہے ہر عمر کے لیے مقدار کا تعین کیا جانا ضروری ہے۔

محققین کے مطابق اگر پھل کھانا صحت کے لیے مفید ہے تو رس کیوں وزن بڑھنے کا سبب بنتا ہے تو اس کے جواب میں ان کا کہنا ہے کہ پھلوں کا رس مائع کیلوری ہے۔

اس تجزیہ کے دوران انہوں نے کیا کہ 100 فیصد پھلوں کے رس کو وزن میں اضافے سے جوڑنے کا ایک ممکنہ طریقہ کار مائع کیلوریز کا استعمال ہے، جس کے نتیجے میں ٹھوس کیلوریز کے استعمال کے مقابلے میں زیادہ وزن میں اضافہ ہوتا ہے۔

ان کے مطابق مکمل پھل کی نسبت رس میں فائبر بہت ہی کم یا نہ ہونے کے برابر ہوتا ہے اس سے آپ کو پیٹ بھرے ہونے کا احساس نہیں ہوتا۔ یہی وجہ ہے کہ ان جوس پینے کے بعد آپ کو اور بھی بھوک لگتی ہے جبکہ رس کی شکل میں آپ کیلوریز لے چکے ہوتے ہیں۔

امریکن اکیڈمی آف پیڈیاٹرکس کے مطابق 6 سال سے کم عمر کے بچوں کو روزانہ ایک گلاس سے بھی کم پھلوں کا رس استعمال کرنا چاہئے۔ جبکہ1 سال سے کم عمر کے بچوں کو جوس دینے سے مکمل گریز  کرنا چاہیے تاہم ماہرین بچوں کی عمر کے  لحاظ پھلوں کے رس کی مقدار کا تعین کیا ہے جو یہاں پیش کیا جارہا ہے تاکہ وزن کو برھنے سے بچایا جاسکے۔

1 سے 3 سال کے بچے کے لیے روزانہ 4 اونس

4 سے 6 سال کے بچے کے لیے روزانہ 6 اونس

7 سے 18 سال کے بچے کے لیے روزانہ 8 اونس تک محدود کریں۔