دنیا میں ایسے افراد کی کمی نہیں ہے جنہیں رات میں اکثر نیند نہیں آتی یا دیر سے آتی ہے جبکہ ماہرین کے مطابق نیند کی کمی کئی جسمانی مسائل کا سبب بنتی ہے تاہم کچھ غذائیں ایسی ہیں جو پرسکون نیند میں مددگار ثابت ہوتی ہے۔

بیڈ کنگڈم کے ماہرین کے مطابق سونے سے ایک گھنٹہ قبل ڈارک چاکلیٹ کھانا پرسکون نیند لانے میں مددگار ثابت ہوسکتا ہے۔

اس کی وجہ یہ ہے کہ ڈارک چاکلیٹ میں نہ صرف انتہائی صحت بخش غذائی اجزاء موجود ہوتے ہیں، بلکہ یہ سیروٹونن کی پیداوار کو بھی فروغ دیتی ہے۔ واضح رہے کہ سیروٹونن کو خوشی کا ہارمون کہا جاتا ہے اور اس کی مناسب مقدار دماغ کو پرسکون رکھنے میں مدد دیتی ہے۔

ماہرین کے مطابق صرف ڈارک چاکلیٹ ہی نہیں ہے جو آپ کو پرسکون نیند میں مدد دیتی ہے بلکہ کیلے، بادام یا گری دار میوے جیسے اخروٹ اور مونگ پھلی کے مکھن کا سونے سے قبل استعمال بھی آپ کو فوری نیند لانے میں معاون ثابت ہوتا ہے۔

بیڈ کنگڈم کے ماہرین نے مزید واضاحت کرتے ہوئے کہا ہے رات گئے بطور اسنیکس مونگ پھلی کے مکھن کا استعمال، نیند کے معیار کو بہتر بنا سکتا ہے، ساتھ ہی یہ آپ کے بلڈ شوگر کی سطح کو مستحکم اور پٹھوں کی نشوونما میں مدد کرتا ہے۔

مونگ پھلی کے مکھن میں ٹرپٹوفن نامی امینو ایسڈ موجود ہوتا ہے جسے جسم میلاٹونن بنانے کے لیے استعمال کرتا ہے واضح رہے کہ یہ ایک ہارمون جو جسم کو آگاہ کرتا ہے اب اسے نیند لینے کی ضرورت ہے۔

اسی طرح کیلے بھی رات کی پرسکون نیند میں مدد دیتے ہیں، کیونکہ ان میں میگنیشیم موجود ہوتا ہے۔ جو جسم کی اندرونی گھڑی کو متوازن رکھنے اور میلاٹونن کی پیداوار بڑھانے میں مدد کرتا ہے۔

پاپ کارن میں بھی ٹرپٹوفن پایا جاتا ہے اس طرح سونے سے قبل اسے بطور اسنیکس کھانا سیروٹونن کی پیداوار کو بڑھا سکتا ہے۔