سونے سے قبل کسی ایسے مشروب کو پینا جس میں کیفین موجود ہومنع کیا جاتا ہے کیونکہ کیفین آپ کو جگاتی ہے اور ارتکاز کو بڑھاتی ہے تاہم ایک نئی تحقیق کے مطابق اگر دن میں مختصر نیند سے قبل کافی پی لی جائے تو بیدار ہونے پر یہ آپ کی توانائی اور چوکسی کو کئی گنا بڑھا دیتی ہے۔

اسنوز گرو جیمز ولسن جو کہ نیند کے ماہر ہیں کہتے ہیں کہ ایک مختصر سی نیند یا جھپکی سے پہلے کافی پینا آپ کی چوکسی کو کئی گنا بڑھا دیتا ہے اس کی وجہ یہ ہے کہ جسم کیفین کو میٹابولائز کرنے میں تقریباً 30 منٹ لیتا ہے، اور جیسے ہی آپ بیدار ہوتے ہیں، کیفین کی چوکسی کا دوہرا فائدہ آپ کو حاصل ہوتا ہے۔

تاہم یہ بات سائنسی طور پر بھی ثابت ہوچکی ہے۔ 2010 کی ایک تحقیق کے مطابق کافی پینے کے فوراً بعد جھپکی لینے سے دماغ کی کیفین حاصل کرنے کی صلاحیت میں اضافہ ہوتا ہے۔

اگرچہ عام خیال یہ ہے کہ کافی نیند کو دور کرتی ہے، لیکن کیفین کو جسم میں اپنا اثر دکھانے میں وقت لگتا ہے، اسی لیے ماہرین کا کہنا ہے کہ اگر آپ محض 20 کی نیند لینا چاہتے ہیں تو سونے سے پہلے کیفین سے بھر پور کافی پینا پرسکون نیند لینے کا ایک بہترین طریقہ ثابت ہوسکتا ہے۔

تاہم نیند کا دورانیہ اگر 30 منٹ سے زیادہ ہو تو ایسی صورت میں کسی کو غنودگی محسوس ہو سکتی ہے کیونکہ لوگ گہری نیند کی حالت میں داخل ہو سکتے ہیں۔ جبکہ رات میں بہتر نیند کے لیے سونے سے تقریباً 6 گھنٹے پہلے کافی کا استعمال نہیں کرنا چاہئے۔

مختصر نیند کے بعد ارتکاز میں اضافے کے لیے ماہرین نے  کافی کے 2 کپ یا 200 ملی گرام کیفین کی مقدار بتائی ہے۔

واضح رہے کہ مختصر دوارنیے کی نیند جسے نیپ بھی کہاجاتا ہے  نیند کی کمی کی علامات کو دور کرنے کا ایک بہترین طریقہ ہے۔ یہ آپ کے ارتکاز کو بڑھاکر آپ کے کام کرنے کی صلاحیت اور کارکردگی کو بڑھا سکتا ہے ۔