آج ہم آپکو بتائیں گے کہ ہارٹ اٹیک اور فالج کو روکنے میں کونسا پھل نہایت ہی مفید ہے۔

ایک حالیہ تحقیق کے مطابق اسٹرابیری جسم میں چکنائی کے ذخائر کو جمع ہونے سے روکتی ہے جو دل کے دورے اور فالج کا سبب بن سکتا ہے۔

تحقیق میں بتایا گیا کہ وٹامن سی سے بھرپور اسٹرابیری شریانوں میں ہائی کولیسٹرول کی وجہ سے پیدا ہونے والی رکاوٹ کو روکتی ہے۔

ماہرین نے 20 سال کی عمروں کے آس پاس 23 صحت مند رضاکاروں کو تحقیق میں شامل کیا جن میں سے کچھ کو 500 گرام اسٹرابیری سے بنا مشروب دیا اور دیگر کو عام چینی سے بنا مشروب دیا گیا، آدھے گھنٹے بعد انہوں نے خون کے نمونے لیے، اس عمل کو ہر 30 منٹ میں چار گھنٹے تک دہرایا گیا۔

تحقیق میں پایا گیا کہ جن لوگوں کو اسٹرابیری کا مشروب پیش کیا گیا تھا، ان میں کم کثافت والے لیپو پروٹین (LDL) یعنی خراب کولیسٹرول کی مقدار بہت کم تھی بہ نسبت ان افراد کے جنہوں نے عام چینی پر مشتمل مشروب استعمال کیا، یہ صحت بخش نتائج اسٹرابیری پینے کے محض ایک گھنٹہ کے اندر ظاہر ہوئے۔

 واضح رہے کہ ایل ڈی ایل کولیسٹرول کی ایک نقصان دہ شکل ہے جو خون کی نالیوں کو تنگ کرنے اور بلاک کرنے کا سبب بنتی ہے جو دل کا دورہ پڑنے یا فالج پر منتج ہوسکتا ہے۔