بڑھتا ہوا وزن کئی امراض کی راہ ہموار کرتا ہے یہی وجہ ہے کہ دنیا کی ایک بڑی آبادی اپنے بڑھے ہوئے وزن سے پریشان ہے اور اسے کم کرنے کے لیے کئی طرح کے جتن کرتی ہے تاہم سائنسدانوں کے مطابق بعض سبزیاں اور پھل وزن کم کرنے میں عین کسی دوا کی طرح کام کرتے ہیں۔

ماہرین اس کی یہ وجہ بتاتے ہیں کہ سبزیاں اور پھل فائبر سے بھرپور ہوتے ہیں جو نہ صرف دیر سے ہضم ہوتے ہیں بلکہ دیر تک آپ کو پیٹ بھرے کا احساس دلاتے ہیں، اس طرح آپ بے وقت کی بھوک کے ساتھ  وزن بڑھنے اور موٹاپے سے بچے رہتے ہیں۔

یہ بات تو سب ہی جانتے ہیں کہ موٹاپا سینکڑوں بیماریوں کا باعث بنتا ہے جس میں ذیابیطس، بلڈ پریشر اور امراضِ قلب شامل ہیں۔

ماہرین کےمطابق پھل اور سبزیاں فائبر سے بھرپور ہونے کے ساتھ اینٹی آکسیڈنٹس، فلے وینولز اور دیگر قیمتی اجزا سے مالا مال ہوتی ہیں۔ یہی وجہ ہے کہ وہ اندرونی سوزش کو کم کرتی ہیں بلند فشارِ خون سے بچاتی ہیں اور وزن بڑھنے کو روکتی ہیں۔ یہی وجہ ہے انہیں وزن کم کرنے کی قدرتی دوا کا نام بھی دیا جاسکتا ہے۔

مثلاً سیب فائبر سے بھرپور ہوتے ہوئے پیٹ بھرنے کا احساس جگاتا ہے۔ اس میں شامل کئی معدنیات چربی بڑھنے سے روکتی ہیں۔ اگر آپ وزن کم کرنا چاہتے ہیں تو سیب ضرور کھائیں۔