دنیا میں ایسے افراد کی کمی نہیں ہیں جو دوسری کی نسبت زیادہ غصیلہ اور جارحانہ رویہ رکھتے ہیں تاہم ایک عام سا سپلیمنٹ اس رویے کو کم کرنے میں مدد دے سکتا ہے۔

پنسلوانیا یونیورسٹی کی ایک نئی تحقیق کے مطابق اومیگا تھری سپلیمنٹ لینے سے ایگریسیو یعنی جارحانہ رویہ کم ہو سکتا ہے۔ اومیگا 3 سپلیمنٹس عام طور پر مچھلی کے تیل کی گولیوں کی شکل میں آتے ہیں۔

جریدے ایگریشن اینڈ وائلنٹ ہیویئر میں شائع ہونے والی اس تحقیق کے مطابق 3918 شرکاء میں اومیگا 3 سپلیمنٹ لینے سے جارحانہ رویے میں اوسطاً 22 فیصد کمی واقع ہوئی۔

اس تحقیق کے اہم مصنف ایڈریئن رائن کا کہنا ہے کہ میرے خیال میں وقت آ گیا ہے کہ جارحیت رویہ  کو کم کرنے کے لیے اومیگا 3 کے سپلیمنٹ کو استعمال کیا جائے۔

رائن نے مزید یہ بھی کہ کہ اومیگا 3 کوئی جادوئی گولی نہیں ہے جو معاشرے میں تشدد کے مسئلے کو مکمل طور پر حل کر دے گی، تاہم اس تحقیق کے نتائج کی بنیاد پر، ہمیں پختہ یقین ہے کہ ایسا ہو سکتا ہے اور اس نئی تحقیق کے بعد اس پر عمل کرنا شروع کر دینا چاہیے۔

اس تحقیق میں تمام شرکاء کو اومیگا تھری کے سپلیمنٹس دیئے گئے تاہم اس کے بعد غصہ دلانے والے حالات کا سامنے کرنے پر بھی ان میں جارحانہ رویہ نہیں دیکھا گیا۔

مصنفین کا کہنا ہے کہ اومیگا تھری سپلیمنٹس کا اثر قلیل مدتی ہے یا یہ طویل مدت تک بھی کار آمد ثابت ہوسکتا ہے اس کے لیے ابھی مزید تحقیق کی ضرورت ہے۔

واضح رہے کہ مچھلی کے تیل کے سپلیمنٹس صحت کے کئی فوائد پیش کرتے ہیں جن میں دماغ اور دل کی صحت قابل ذکر ہے، حالانکہ ایک حالیہ تحقیق کے مطابق مچھلی کا تیل پہلی بار دل کی بیماری یا فالج کا خطرہ بڑھا سکتا ہے۔