امریکی صدر ڈونلڈ ٹرمپ نے سعودی عرب اور متحدہ عرب امارات کو ہتھیاروں کی فروخت روکنے کی قراردادیں ویٹو کردیں۔

غیر ملکی خبر  رساں ادارے کے مطابق امریکی صدر ڈونلڈ ٹرمپ نے سعودی عرب کو اسلحے کی فروخت روکنے کی قرارداد ویٹو کردی جس کے بعد اربوں ڈالر کا اسلحہ سعودی عرب اور متحدہ عرب امارات کو فروخت کرنے کی راہ ہموار ہوگئی۔

رواں ماہ 8 جولائی کو امریکی کانگریس نے سعودی عرب کو اسلحہ فروخت کرنے کے خلاف قرارداد منظور کی تھی۔امریکی کانگریس نے عرب ممالک کو اسلحہ فروخت کرنے کے خلاف تین قراردادیں پاس کی تھیں۔ارکان کانگریس نے موقف اختیار کیا  تھا کہ اسلحے کی فروخت خطے میں بحالی امن کی کوشش کی راہ میں رکاوٹ ہے۔

واضح رہے کہ اراکین کانگریس عرب ممالک کو اسلحہ فروخت کرنے کے سخت مخالف ہیں جبکہ   امریکی صدر ڈونلڈ ٹرمپ نے سعودی عرب کو آٹھ اعشاریہ 1 ارب ڈالر کا اسلحہ دینے کا اعلان کیا تھا۔

دوسری جانب امریکی صدر ڈونلڈ ٹرمپ کا کہناہے کہ کانگریس کی قرارداد خطے میں امریکی اثرورسوخ متاثر کرسکتی ہے،اسی تناظر میں قرارداد ویٹو کی۔

امریکی وزیرخارجہ مائیک پومپیو نے بھی صدر ٹرمپ کی حمایت کرتے  ہوئے  کہا ہے  کہ ایران کے خلاف سعودی عرب کو اسلحے کی فراہمی ناگزیر ہے۔

صدر ٹرمپ کی جانب سے ویٹو پاور استعمال کرنے کا یہ تیسرا واقعہ ہے۔

یاد  رہے کہ   سعودی عرب امریکی ہتھیار یمن کے مظلوم لوگوں کے خلاف استعمال کر رہا ہے اور ان ہتھیاروں سے اب تک لاکھوں یمنی شہید، زخمی اور بے گھر ہوئے ہیں لیکن اس کے باوجود سعودی عرب کو یمن میں شکست کا سامنا ہے۔