پاکستان پیپلزپارٹی کے چیئرمین بلاول بھٹو زرداری نے کہا ہے کہ پاکستان پیپلزپارٹی اپنا 52واں یوم تاسیس 30 نومبر کو آزاد کشمیر کے شہر مظفرآباد میں منائے گی۔

تفصیلات کے مطابق پاکستان پیپلزپارٹی کے چیئرمین بلاول بھٹو زرداری نے سماجی رابطہ کی ویب سائٹ ٹوئٹر پر اپنے ایک ٹوئٹ میں کہا کہ صرف مضبوط عوامی ایجنڈا ہی جمہوری، اقتصادی اور انتظامی بحرانوں سے نکال سکتا ہے۔

اپنے پیغام میں بلاول بھٹو زرداری کا کہنا تھا کہ یوم تاسیس کے موقع پر ہم اپنے بنیادی اصولوں پر عہد کو دہرائیں گے اور ملک کی نئی سمت کو متعین کریں گے۔

دوسری جانب سینئر رہنما پاکستان پیپلزپارٹی و ممبر کشمیر کونسل آزادکشمیر میر محمد یونس نے بھی اپنے ایک بیان میں کہا تھا کہ پیپلز پارٹی کا 52واں یوم تاسیس پورے آزادکشمیر میں انتہائی جوش و جذبے کے ساتھ منایا جائیگا۔

محمد یونس کا کہنا تھا کہ 30 نومبر پاکستان پیپلزپارٹی کا 52 یوم تاسیس اس بات کی غمازی کرتا ہے کہ پیپلزپارٹی اس ملک کے محنت کشوں مزدوروں،ترقی پسندوں اور جمہوریت کے علمبرداروں کا سیاسی مرکز ہے اور اس کا جنم پاکستان کے محنت کشوں کی جدوجہد سے ہواجس کی بنیاد ذوالفقار علی بھٹو نے رکھی جو اس ملک کے مظلوموں کی آواز بن گئے۔

واضح رہے اس سے قبل گزشتہ روز چیئرمین پاکستان پیپلز پارٹی بلاول بھٹو زرداری نےسابق صدر آصف زرداری سے ملاقات کے بعد میڈیا سے بات چیت  کرتے ہوئےکہا تھا کہ صدر زرداری کی طبیعت سخت ناساز ہے،حکومت کے ان سارے ہتھکنڈوں کے باوجود صدر زرداری کا مورال بلند ہے، ان کی بہادری آپ سب کے سامنے ہے۔

 بلاول بھٹو زرداری کا کہنا تھا کہ آج صدر زرداری اپنی بات پر قائم ہیں، آج وہ اپنے نظریہ پر قائم ہے، صدر زرداری کہتے ہیں کہ آپ نے جو میرے ساتھ کرنا ہے کرلومگر وہ اپنے موقف سے اپنے اصولوں سے ہٹنے کے لئے تیار نہیں ہیں۔

بلاول بھٹو زرداری کا مزید کہنا تھا کہ یہ پیپلزپارٹی کے ہر کارکن کے لئے فخر کی بات ہے کہ ہمارا قائد نہ جھکتا ہے، نہ بکتا ہے اور نہ بھاگتا ہے۔ جب سے یہ جعلی کیسز بنے ہیں جبکہ خاص طور پر ہمارا کیس سندھ کا مقدمہ، سندھ کا الزام اور سندھ کا کیس پنڈی میں چل رہا ہے اس کے بارے میں ہم اپنے اعتراضات سب کے سامنے ظاہر کرتے رہے ہیں۔