ترجمان دفتر خارجہ ڈاکٹر محمد فیصل نے بتایا ہے کہ اردن میں آگ لگنے کے واقعہ میں 13 پاکستانی جاں بحق ہوئے ہیں۔

تفصیلات کے مطابق جاں بحق افراد میں 7 بچے،4 خواتین اور 2 مرد شامل ہیں جبکہ اردن میں آگ لگنے کا واقعہ رات 2 بجے پیش آیا۔

انہوں نے بتایا کہ 3 پاکستانی آگ لگنے سے زخمی بھی ہوئے جن کی حالت خطرے سے باہر ہیں جبکہ متاثرین میں صوبہ سندھ کے ضلع دادو سے جوئیہ فیملی کے افراد بھی شامل ہیں۔

دفتر خارجہ نے مزید بتایا کہ متاثرین کے سربراہ  علی شیر واقعہ میں بچ گئے ہیں جبکہ اردن میں پاکستانی سفارتخانہ کے اہلکار متاثرین کے اہلخانہ سے رابطے میں ہیں۔

وزارت خارجہ کی جانب سے پاکستانی سفارتخانہ کو متاثرین کے اہل خانہ سے ہر ممکن تعاون کی ہدایت کی گئی ہے۔

واقعہ میں زخمی اور جاں بحق افراد سے متعلق تفصیلات کے لیے اردن میں پاکستانی سفارتخانہ  کے سیکنڈ سیکرٹری حسنین حیدر سے رابطہ کیا جا سکتا ہے۔

یاد رہے کہ اردن میں گھرمیں آتشزدگی کےواقعےمیں بچوں اورخواتین سمیت 13  پاکستانی جاں بحق ہوگئےہیں۔

غیرملکی خبررساں اداروں کےمطابق مغربی اردن میں ایک گھرمیں آتشزدگی سے 8 بچوں سمیت 13 پاکستانی شہری جاں بحق اور 3 شدید زخمی ہوگئے۔

یہ افسوس ناک واقعہ الکرامہ کے علاقے میں ایک کھیت میں پیش آیا جہاں صبح سویرے ٹین کی چادروں سے بنے گھر میں آگ بھڑک اٹھی۔

 آگ اتنی خوفناک تھی کہ اس نے تیزی سے گھر کو اپنی لپیٹ میں لےلیااوراندرموجودلوگوں کوجان بچانےکاموقع نہ مل سکا۔ آتش زدگی سے 13 افراد جاں بحق ہوگئے جن میں 8 بچے اور 4 خواتین شامل ہیں۔