وزیر خارجہ مخدوم شاہ محمود قریشی  نے کہا ہے کہ خطے میں امن نہ صرف ہماری خواہش ہے بلکہ ترجیح بھی جبکہ اگر ا فغانستان میں امن ہوگا تو پاکستان سمیت پورے خطے میں امن ہوگا۔

تفصیلات کے مطابق ملتان  میں وزیر خارجہ مخدوم شاہ محمود قریشی نے  ملتان میں کارکنوں سے خطاب کرتے ہوئے کہا کہ افغانستان میں امن کیلئے ہمارے اقدامات کو عالمی دنیا سراہا رہی ہے اور سعودی عرب بااعتماد دوست ہے ایران دوست بھی ہے اور ہمسائیہ بھی۔

وزیر خارجہ نے کہا کہ بھارتی حکومت کے  اقدامات کی بدولت بھارت کا حقیقی چہرہ بے نقاب ہوچکا ہے ، عالمی دنیا 80لاکھ نہتے کشمیریوں کو بھارتی ظلم و ستم سے نجات دلائے ۔

شاہ محمود قریشی   نے یہ بھی کہا کہ بھارت کی جانب سے انسانی حقوق کی بدترین پامالی روکی جائے، مقبوضہ کشمیر میں کرفیو ختم کروانے کیلئے ہر فورم پر آواز بلند کی جائے۔

وزیر خارجہ کا کہنا تھا کہ 5    فروری کو پوری قوم کشمیر کے ساتھ کھڑی ہوگی جبکہ اس دن یوم کشمیر ایک نئے جوش ولولہ سے منائیں گے۔

امریکی صدر پاکستان کا دورہ کریں گے، شاہ محمود قریشی

  شاہ محمود قریشی  کا یہ بھی کہنا تھا  کہ کامیاب خارجہ پالیسی کی بدولت 56سال بعد مسئلہ کشمیر سلامتی کونسل میں زیر بحث آیا، سلامتی کونسل نے اپنے حالیہ اجلاس میں ایک بار پھر پاکستانی موقف کی تائید کی۔

وزیر خارجہ نے کہا کہ وزیراعظم  کی ہدایت پر ایران ،سعودی عرب اور امریکہ کا دورہ کیا ، دورہ کے دوران ایران اور سعودی عرب کے درمیان کشیدگی کم کروانے کیلئے بھرپورکوشش کی ، چند روز پہلے جو کشیدگی دکھائی دے رہی تھی اب نہیں ہے۔

اپنے بیان میں شاہ محمود قریشی   نے یہ بھی کہا کہ عالمی اداروں نے پاکستان کی معیشت میں بہتری کو سراہاہے اور  کرپٹ عناصر احتساب بلا امتیازہماری پالیسی ہے۔

وزیر خارجہ مخدوم شاہ محمود قریشی   نے مزید کہا کہ ہماری پالیسیوں کے مثبت نتائج سامنے آرہے ہیں  جبکہ حکومت پر ابھی تک کرپشن کا کوئی الزام سامنے نہیں آیا اور نہ آئیگا۔