یوم یکجہتی کشمیر کے موقع پر اپنے کشمیری بھائیوں سے اظہار یکجہتی کرنے کے لیے بول نیو ز نے کشمیر کا ملی نغمہ ریلیز کردیا۔

پاکستان میں ہر سال یومِ یکجہتی کشمیر 5 فروری کو ملی جوش وجذبے سے منایا جاتا ہے اور اس موقع پر پاکستانی قوم اپنے کشمیری بہن بھائیوں سے اظہار یکجہتی کرتے ہیں۔

سات دہائیوں سے بھارت کے غاصبانہ تسلط کے خلاف اور پاکستان سے الحاق کی کشمیری خواہش کو پاکستان میں انتہائی عزت و احترام کی نظر سے دیکھا جاتا ہے اور پاکستان نے ہمیشہ کشمیریوں کے حق ِ خود ارادیت کی اقوامِ عالم میں حمایت کی ہے۔

اس موقع پر کشمیریوں سے محبت اور ان کی حمایت کے اظہار کے لیے ایک ملی نغمہ جاری کیا ہے جس کے بول ’’زمانہ چپ ہو تو ظالموں سے مظلوموں کی آہیں لڑیں گی‘‘ ہیں۔

مظلوم کشمیریوں سے اظہار یکجہتی کے لیے بنایا گیا یہ نغمہ ریلیز ہوتے ہی سوشل میڈیا پر عوام کی خصوصی توجہ کا مرکز بن گیا ہےا ور اسے بے پناہ پذیریائی مل رہی ہے۔

یاد رہے کہ آج قومی نشریاتی ادارے ’ریڈیو پاکستان‘ کی جانب سے بھی کشمیر سے یکجہتی کے اظہار کے لئے دو نغمے جاری کئے گئے ہیں۔

 ریڈیو پاکستان کی جانب سے کشمیر ڈے یعنی 5 فروری کی مناسبت سے دو نغمے ”جنت نہ جلاؤ” اور ”اے خدا” جاری کئے گئے ہیں۔

ان نغموں کو باقاعدہ طور پر جاری کرنے کے لئے ایک خصوصی تقریب کا انعقاد کیا گیا جس میں وزیراعظم عمران خان کی معاون خصوصی ڈاکٹر فردوس عاشق اعوان نے بطور مہمان خصوصی شرکت کی۔