وزیر خارجہ مخدوم شاہ محمود قریشی نے کہا ہے کہ یہ ایک ایسا عالمی وبا ئی چیلنج ہے جس نے پوری دنیا کو اپنی لپیٹ میں لے رکھا ہے ۔

وزیر خارجہ مخدوم شاہ محمود کی زیر صدارت وزارت خارجہ میں کرونا وبائی صورتحال اور اس وبا کے نتیجے میں معیشت پر پڑنے والے منفی اثرات کے حوالے سے اعلیٰ سطحی اجلاس ہوا ۔

اجلاس میں وزیر خارجہ مخدوم شاہ محمود قریشی نے شرکاء اجلاس کو قرضوں میں سہولت سے متعلق، وزیر اعظم عمران خان کی تجویز کو بین الاقوامی سطح پر اجاگر کرنے کے حوالے سے کی گئی اپنی حالیہ کاوشوں  اور سیکرٹری جنرل اقوام متحدہ، سیکرٹری جنرل او آئی سی، سیکرٹری جنرل شنگھائی تعاون تنظیم، یورپی اور سارک ممالک کے وزرائے خارجہ کے ساتھ ہونیوالے حالیہ ٹیلیفونک رابطوں  سے بھی، شرکاء اجلاس کو آگاہ کیا جبکہ مستقل مندوبین کو بھی اس حوالے سے بین الاقوامی فورمز پر اپنی کاوشیں بروئے کار لانے کی ہدایت کی۔

وزیر خارجہ نےکہا  کہ پاکستان  جیسے کم معاشی وسائل کے حامل ترقی پذیر ممالک کو، اس وبا اور ملکی معیشت پر اس کے مضر اثرات سے نبرد آزما ہونے میں شدید مشکلات کا سامنا ہے، ایک طرف برآمدات کی شرح میں بہت حد تک کمی واقع ہو چکی ہے تو دوسری طرف لاک ڈاؤن کی وجہ سے معاشی سرگرمیاں تعطل کا شکار ہیں ۔

وزیرخارجہ کا شنگھائی تعاون تنظیم کے سیکرٹری جنرل سے ٹیلیفونک رابطہ

شاہ محمود قریشی نے یہ بھی کہا کہ اس صورت حال کے پیش نظر ، وزیر اعظم عمران خان نے کم وسائل کے حامل، ترقی پذیر ممالک کو واجب الادا قرضوں کی ادائیگی میں سہولت فراہم کرنے کی تجویز دی ہے جسے مختلف بین الاقوامی فورمز پر زیر بحث لایا جا رہا ہے ۔

وزیر خارجہ مخدوم شاہ محمود قریشی  نے مزید کہا کہ واجب الادا قرضوں کی ری سٹرکچرنگ، جہاں ایک طرف کمزور معیشتوں کو اس عالمی چیلنج سے نمٹنے اور قیمتی انسانی جانوں کو بچانے میں مدد دے گی تو دوسری طرف دیرپا اور پائیدار ترقی کے اہداف کے حصول میں معاون ثابت ہو گی ۔

مشیر خزانہ حفیظ شیخ، وفاقی وزیر منصوبہ بندی اسد عمر، وفاقی وزیر برائے اقتصادی امور حماد اظہر ، سیکرٹری خارجہ سہیل محمود اور وزارت خارجہ کے سینیئر افسران  نے بھی اجلاس میں شریک جبکہ نیو یارک میں پاکستان کے مستقل مندوب منیر اکرم اور جنیوا میں پاکستان کے مستقل مندوب خلیل ہاشمی بذریعہ ویڈیو لنک  کے ذریعہ اجلاس میں شرکت کی۔