چین نے سی پیک منصوبے کو ایک اعلیٰ معیار کا بی آر آئی منصوبہ بنانے کی حمایت کرنے کا اعلان کردیا ہے۔

چینی وزارت خارجہ کے ترجمان ژاو لی جیان نے سی پیک منصوبے اور وزیر اعظم عمران خان کے بیان پر تبصرہ کرتے ہوئے کہا ہے کہ ہم چین پاکستان اقتصادی راہداری پر وزیر اعظم عمران خان کے بیان سے متفق ہیں یہ چین پاکستان اقتصادی راہداری منصوبہ بیلٹ اینڈ روڈ پروگرام کا اہم ابتدائی پائلٹ منصوبہ ہے۔

انہوں نے کہا کہ چھ برس قبل شروع کیے جانے والے اس منصوبے کا مقصد پاکستان اور چین کی مشترکہ ترقی کو فروغ دینا ہے، سی پیک نے پاکستان کی اقتصادی و معاشرتی ترقی اور عوامی فلاح و بہبود اور علاقائی منسلکی میں اضافہ کیا ہے۔

چینی وزارت خارجہ کے ترجمان کا مزید کہنا تھا کہ چین سی پیک کی ترقی کی حمایت جاری رکھے گا۔

اُن کا مزید کہنا تھا کہ چین پاکستان کی جانب سے ہماری قیادت کے اتفاق رائے شدہ ترقی پر عملدرآمد کی حمایت جاری رکھے گا، چین انفراسٹرکچر ڈیویلپمنٹ کے لئے کام کی حمایت جاری رکھے گا، عوام کے زریعہ معاش، صنعت اور زرعی تعاون کے فروغ کی حمایت جاری رکھے گا۔چین اس منصوبے کو ایک اعلیٰ معیار کا بی آر آئی منصوبہ بنانے کی حمایت کرے گا جس سے دونوں ممالک کے عوام کا معیار زندگی بہتر ہو۔