پاکستان کی معروف اداکارہ ارمینہ خان اداکار یاسر حسین کا ساتھ دینے کے لیے میدان میں آگئیں۔

اداکارہ ارمینہ خان نے سماجی رابطے کی ویب سائٹ ٹوئٹر پرسوشل میڈیا صارفین کی تنقید کے شکار اداکار یاسر حسین کا ساتھ دینے کے لیے میدان میں قدم رکھ دیا۔

ارمینہ خان نے ٹوئٹ کرتے ہوئے لکھا کہ یاسر حسین کو سوشل میڈیا پر ہراساں اور دھونس کا نشانہ بنایا جارہا ہے۔

https://twitter.com/ArmeenaRK/status/1283449315814445057

اداکارہ نے لکھا کہ میں جانتی ہوں کہ یاسر حسین ایک عوامی شخصیت ہیں لیکن میں نے اُن کے خلاف سوشل میڈیا پر جو تبصرے اور کمنٹس پڑھے ہیں وہ فرسودہ اور نفرت انگیز ہیں۔

اداکار یاسر پر کی جانے والی تنقید کے حوالےسے ارمینہ نے کہا کہ ہر پاکستانی کو اپنی رائے کا اظہار خیال کرنے کی اجازت ہے اِسی طرح یاسر حسین کے پاس بھی یہ حق ہے کہ وہ اپنے خیالات کا اظہار کرے۔

اُنہوں نےشدید غصے کا اظہار کرتے ہوئے لکھا کہ یاسر اور اُن کی فیملی کو نازیبا ناموں سے پُکارنا بند کریں۔

یاد رہے کہ اداکارہ کے اِس ٹوئٹ پر ٹوئٹر صارفین نے مخالف ردعمل دیتے ہوئے اِس مسئلے پر اپنی رائے کا اظہار خیال کیا۔

اس حوالے سے نازیہ نامی صارف نے ٹوئٹ کیا کہ یاسر حسین کو کچھ بھی بولنے سے پہلے سوچنا چاہیے یا پھر اپنی رائے کو اظہار کرنے کے بعد ہر طرح کے نتائج کے لیے تیار رہنا چاہیے۔

صارف نے لکھا کہ یاسر نے بین الاقوامی پلیٹ فارم پر پاکستان کی منفی تصویر پیش کی ہے۔

انہوں نے مزید کہا کہ ہم پھر بھی تُرک فنکاروں کا پاکستان میں دل سے استقبال کریں گے۔

یاد رہے کہ گزشتہ دنوں یاسر حسین نے ترک اداکارہ اسراء بلجیک کو پاکستانی کمپنی کا برانڈ ایمبیسڈر بنائے جانے پر شدید برہمی کا اظہار کیا تھا۔

یاسر حسین نے فوٹو اور ویڈیو شیئرنگ ایپ انسٹاگرام اسٹوری میں مداحوں سے مشورہ مانگتے ہوئے اپنی رائے دی تھی اور کہا تھا کہ آپ کو نہیں لگتا کہ پاکستانی برانڈ کی برانڈ ایمبیسڈر پاکستانی ہونی چاہئے، نہ بھارتی اور نہ ہی تُرکش؟

 انہوں نے اپنے پیغام میں پاکستان زندہ آباد بھی لکھا تھا۔

یاسر نے کہا تھا کہ ’کیا ماہرہ، صبا، سونیا، منال، ایمن، زارا، ہانیہ، ثنا، یمنیٰ، ارمینہ، سارہ، حرا میں سے کوئی اس قابل نہیں کہ پاکستانی برانڈ کی ایمبیسڈر بن سکے؟

واضح رہے کہ اداکار یاسر نے یہ بھی بتایا تھا کہ انہوں نے اہلیہ اقراء عزیز کا نام اس لیے نہیں لیا کہ وہ پہلے ہی ایک موبائل کمپنی کی برانڈ ایمبیسڈر ہیں۔